جناح روڈ، قندھاری بازار سمیت مختلف علاقوں میں مشکوک سرگرمیوں کی شکایات

 کوئٹہ شہر کے مختلف اہم شاہراہوں اور بازاروں میں رات گئے مبینہ غیر اخلاقی سرگرمیوں اور مشکوک افراد کی نقل و حرکت کے حوالے سے شہریوں میں شدید تشویش پائی جا رہی ہے۔ عوامی حلقوں کا کہنا ہے کہ جناح روڈ، قندھاری بازار سمیت شہر کے دیگر اہم علاقوں میں رات تقریباً 10 بجے کے بعد سے صبح 4 بجے تک بعض مشکوک سرگرمیوں میں ملوث افراد سڑکوں پر موجود رہتے ہیں، جس کے باعث شہریوں، بالخصوص خاندانوں اور رات کے اوقات میں سفر کرنے والے افراد کو مشکلات اور پریشانی کا سامنا کرنا پڑتا ہے شہریوں کے مطابق رات کے اوقات میں اہم شاہراہوں اور بازاروں میں ایسی سرگرمیوں کے باعث شہر کا ماحول متاثر ہو رہا ہے۔ عوامی حلقوں نے اس صورتحال پر تشویش کا اظہار کرتے ہوئے کہا ہے کہ کوئٹہ ایک قبائلی، مذہبی اور روایتی معاشرے کا حامل شہر ہے، جہاں شہری اپنے خاندانوں کے ساتھ پُرامن اور باوقار ماحول میں زندگی گزارنا چاہتے ہیں۔ عوامی حلقوں کا کہنا ہے کہ اس حوالے سے پولیس اور متعلقہ اعلیٰ حکام کو متعدد مرتبہ آگاہ کیا جا چکا ہے، تاہم شکایات کے باوجود م¶ثر اور مستقل کارروائی نظر نہیں آ رہی۔ شہریوں نے مطالبہ کیا ہے کہ پولیس اور ضلعی انتظامیہ اہم شاہراہوں، بازاروں اور عوامی مقامات پر رات کے اوقات میں گشت کا نظام م¶ثر بنائیں اور مشکوک یا غیر قانونی سرگرمیوں میں ملوث عناصر کے خلاف قانون کے مطابق کارروائی کی جائے۔شہریوں نے کہا کہ قانون سب کے لیے برابر ہونا چاہیے اور کسی بھی شخص کو عوامی مقامات پر ایسی سرگرمیوں کی اجازت نہیں ہونی چاہیے جس سے شہریوں کو مشکلات کا سامنا کرنا پڑے یا معاشرتی ماحول متاثر ہو۔ تاہم کارروائی کرتے وقت شہریوں کی عزت، بنیادی حقوق اور قانون کے تقاضوں کو بھی ملحوظِ خاطر رکھا جائے۔عوامی حلقوں نے مزید کہا کہ اگر شہر میں کسی قسم کی غیر قانونی سرگرمی جاری ہے تو متعلقہ اداروں کی ذمہ داری ہے کہ وہ اس کا سدباب کریں۔ صرف اعلانات اور وقتی کارروائیوں کے بجائے مستقل بنیادوں پر نگرانی اور گشت کا نظام قائم کیا جائے تاکہ شہر میں امن و امان کے ساتھ ساتھ ایک محفوظ اور باوقار ماحول بھی یقینی بنایا جا سکے۔شہریوں نے وزیراعلیٰ بلوچستان، آئی جی پولیس بلوچستان، ڈپٹی کمشنر کوئٹہ اور دیگر متعلقہ حکام سے مطالبہ کیا ہے کہ کوئٹہ شہر کی اہم شاہراہوں اور بازاروں میں رات گئے جاری مبینہ غیر اخلاقی و غیر قانونی سرگرمیوں کا فوری نوٹس لیا جائے، شکایات کی شفاف تحقیقات کی جائیں اور قانون کی خلاف ورزی ثابت ہونے پر ذمہ دار عناصر کے خلاف بلاامتیاز کارروائی عمل میں لائی جائے۔