بلوچستان کے اسکولوں میں ڈیسک فراہم کرنے کا اعلان، 3 ماہ بعد بھی عملدرآمد نہ ہوسکا

کوئٹہ: بلوچستان کے سرکاری اسکولوں میں طلبہ کو ڈیسک فراہم کرنے کے اعلان پر 3 ماہ گزرنے کے باوجود عملدرآمد نہیں ہوسکا، جس کے باعث صوبے کے بیشتر اسکولوں میں بچے تاحال ٹاٹ پر بیٹھ کر تعلیم حاصل کرنے پر مجبور ہیں۔

وزیراعلیٰ بلوچستان میر سرفراز بگٹی نے اسکولوں میں ٹاٹ کلچر کے خاتمے اور طلبہ کو بہتر تعلیمی ماحول فراہم کرنے کے لیے 3 ماہ کے اندر ڈیسک فراہم کرنے کا اعلان کیا تھا، تاہم مقررہ مدت گزرنے کے باوجود اسکولوں میں ڈیسک کی فراہمی شروع نہیں ہوسکی۔

ڈائریکٹر اسکولز اختر کھیتران کے مطابق ڈیسک کی فراہمی سے متعلق منصوبے کی سمری حکومت کو بھجوائی جاچکی ہے۔ حکومت کی جانب سے فنڈز جاری ہوتے ہی سرکاری اسکولوں میں ڈیسک فراہم کرنے کا عمل شروع کردیا جائے گا۔

واضح رہے کہ بلوچستان کے متعدد سرکاری اسکولوں میں بنیادی سہولیات کی کمی کے باعث طلبہ کو مشکلات کا سامنا ہے، جبکہ ٹاٹ کے بجائے ڈیسک کی فراہمی سے بچوں کو بہتر تعلیمی ماحول میسر آنے کی امید ہے۔