اسلام آباد سے بڑی خبر،عمران خان کی جیل اور ہسپتال منتقلی پر اپوزیشن کا بڑا ایکشن پلان تیار

اسلام آباد سے بڑی خبر،عمران خان کی جیل اور ہسپتال منتقلی پر اپوزیشن کا بڑا ایکشن پلان تیار

جمعیت علمائے اسلام (ف) کے سربراہ مولانا فضل الرحمان کی رہائش گاہ پر اپوزیشن اتحاد کا پہلا اور اہم اجلاس منعقد ہوا، جس میں ملک کی موجودہ سیاسی صورتحال، حکومتی رویے اور آئندہ کی مشترکہ حکمت عملی پر تفصیلی مشاورت کی گئی۔

اجلاس میں قومی اسمبلی میں اپوزیشن لیڈر محمود خان اچکزئی، سینیٹ میں قائد حزب اختلاف، پی ٹی آئی کے سیکریٹری جنرل سلمان اکرم راجہ، اسد قیصر، عامر ڈوگر، خیبر پختونخوا کے پی ٹی آئی صدر جنید اکبر، سینیٹر دلاور اور شاہد خٹک نے شرکت کی۔ جے یو آئی کی جانب سے سینیٹر کامران مرتضیٰ اور مولانا عبد الواسع بھی اجلاس میں موجود تھے۔

اجلاس کے دوران بانی پی ٹی آئی عمران خان کی ہسپتال منتقلی اور پھر دوبارہ جیل واپس بھیجے جانے کے معاملے پر حکومتی اقدامات اور قانونی نکات کا تفصیلی جائزہ لیا گیا۔

ذرائع کے مطابق اپوزیشن جماعتوں کے درمیان باہمی رابطوں کو مزید فعال بنانے، حکومت کے خلاف مشترکہ سیاسی موقف اپنائے جانے اور پارلیمانی محاذ پر متحد ہو کر پیش رفت کرنے کے لیے تجاویز پر تبادلہ خیال کیا گیا۔

یاد رہے کہ ایک روز قبل ہی مولانا فضل الرحمان نے تمام اپوزیشن جماعتوں کے اتحاد کے قیام کا باقاعدہ اعلان کیا تھا اور واضح کیا تھا کہ آگے کا لائحہ عمل باہمی مشاورت کے ساتھ حتمی شکل دیا جائے گا۔