علی حسن زہری کون ہیں، نہیں جانتا، ساجد ترین

کوئٹہ: بلوچستان نیشنل پارٹی (بی این پی) کے رہنما اور رکن بلوچستان اسمبلی ساجد ترین ایڈووکیٹ نے علی حسن زہری کے بیان پر ردعمل دیتے ہوئے کہا ہے کہ وہ نہیں جانتے علی حسن زہری کون ہیں، کہاں سے آئے اور ان کا تعلق کس حلقے سے ہے۔

میڈیا سے گفتگو کرتے ہوئے ساجد ترین نے کہا کہ انہیں معلوم نہیں کہ علی حسن زہری کو سردار اختر جان مینگل کی کون سی بات ناگوار گزری ہے۔

انہوں نے کہا کہ سیاسی اختلاف رائے اپنی جگہ، تاہم ذاتی نوعیت کے بیانات سے گریز کرنا چاہیے۔ ساجد ترین کا کہنا تھا کہ متعلقہ حلقوں کو ایسے افراد کے بیانات کا نوٹس لینا چاہیے۔

واضح رہے کہ علی حسن زہری کے بیان پر بلوچستان کی سیاسی حلقوں میں ردعمل سامنے آ رہا ہے۔