سریاب میں چوری کی وارداتیں، شہری اور طلباء خوف کا شکار

کوئٹہ کے علاقے سریاب، کیچی بیگ تھانے کی حدود میں امدادیہ مدرسے کے گیٹ کے قریب مبینہ طور پر مسلح چوروں کی سرگرمیاں بڑھ گئی ہیں۔ اہلِ علاقہ کے مطابق روزانہ کی بنیاد پر چار مسلح افراد ناکہ لگا کر مدرسے کے طلباء، علماء اور عام شہریوں کو لوٹ رہے ہیں۔

ملزمان شہریوں سے موٹر سائیکلیں، موبائل فونز اور نقدی رقم چھین کر باآسانی فرار ہو جاتے ہیں، جبکہ مسلسل وارداتوں کے باوجود مؤثر کارروائی نہ ہونے پر شہریوں میں تشویش پائی جا رہی ہے۔

مدرسے کے طلباء، علماء اور اہلِ علاقہ نے آئی جی پولیس، ایس ایچ او کیچی بیگ، ایس پی سریاب اور ضلعی انتظامیہ سے مطالبہ کیا ہے کہ علاقے میں گشت بڑھایا جائے، ملزمان کے خلاف فوری کارروائی کی جائے اور شہریوں کو تحفظ فراہم کیا جائے۔

اہلِ علاقہ کا کہنا ہے کہ بروقت اقدامات نہ کیے گئے تو جرائم میں مزید اضافہ ہو سکتا ہے۔