لاہور ہائیکورٹ کا بڑا فیصلہ؛ عدم ادائیگی پر قید کاٹنے سے جرمانہ ختم نہیں ہوگا

لاہور: لاہور ہائیکورٹ نے قرار دیا ہے کہ نیب مقدمات میں جرمانہ ادا نہ کرنے پر قید کاٹ لینے سے ملزم کی مالی ذمہ داری ختم نہیں ہوتی، بلکہ طویل عرصہ گزرنے کے باوجود جرمانے کی رقم وصول کی جاسکتی ہے۔

چیف جسٹس عالیہ نیلم اور جسٹس محمد امجد پرویز پر مشتمل بینچ نے اس حوالے سے 15 صفحات پر مشتمل فیصلہ جاری کیا۔

عدالت نے مہر محمد باقر کی جانب سے جرمانے کی وصولی روکنے کے لیے دائر درخواست خارج کرتے ہوئے متعلقہ حکام کو 20 لاکھ روپے کی وصولی کی کارروائی تین ماہ میں مکمل کرنے کا حکم دیا۔

فیصلے میں کہا گیا کہ جرمانہ ادا نہ کرنے پر ایک سال قید کاٹ لینے کے باوجود ملزم مالی ذمہ داری سے بری نہیں ہوسکتا۔ نیب آرڈیننس کے تحت جرمانے کی رقم بقایاجاتِ مال گزاری کے طور پر وصول کی جاسکتی ہے اور اسے دہری سزا قرار نہیں دیا جاسکتا۔

عدالت نے مزید قرار دیا کہ نیب مقدمات میں جرمانے کی وصولی پر چھ سالہ قانونی مدت کی پابندی لاگو نہیں ہوتی، کیونکہ اس معاملے میں خصوصی قانون کو فوقیت حاصل ہے۔

فیصلے کے مطابق بدعنوانی کے مقدمات میں عائد جرمانوں کی وصولی کی ذمہ داری برقرار رہتی ہے، چاہے ملزم عدم ادائیگی پر قید بھی کاٹ چکا ہو۔