آزاد کشمیر انتخابات کے 3 مراحل مکمل، بڑے برج الٹ گئے

آزاد کشمیر انتخابات کے 3 مراحل مکمل، بڑے برج الٹ گئے

مسلم لیگ ن 24 نشستوں کے ساتھ سب سے آگے، پیپلز پارٹی 12 نشستیں حاصل کرکے دوسری بڑی جماعت بن گئی

مظفرآباد: آزاد کشمیر قانون ساز اسمبلی کے انتخابات کے تینوں مراحل مکمل ہوگئے، جس کے بعد کئی اہم سیاسی شخصیات کو شکست کا سامنا کرنا پڑا جبکہ مسلم لیگ ن سب سے بڑی جماعت بن کر سامنے آئی ہے۔

انتخابی نتائج کے مطابق 38 نشستوں پر مکمل ہونے والے انتخابی عمل میں مسلم لیگ ن نے 24 نشستیں حاصل کیں، جبکہ پاکستان پیپلز پارٹی 12 نشستوں کے ساتھ دوسری بڑی سیاسی جماعت بن گئی۔ عوام دست و بازو پارٹی ایک نشست حاصل کرنے میں کامیاب رہی۔

رپورٹس کے مطابق ایل اے 16 میں مسلم لیگ ن کے امیدوار میر اکبر کو واضح برتری حاصل ہے، جبکہ بعض حلقوں کے نتائج کا عمل مکمل ہونا باقی ہے۔

آزاد کشمیر انتخابات میں کئی بڑی سیاسی جماعتوں کے اہم رہنماؤں کو شکست کا سامنا کرنا پڑا۔ 24 سیاسی جماعتوں میں سے 20 جماعتیں کوئی نشست حاصل نہ کرسکیں، جبکہ پاکستان تحریک انصاف نے انتخابات کا بائیکاٹ کیا تھا۔

انتخابات میں سابق وزرائے اعظم بھی کامیابی حاصل نہ کر سکے۔ سابق وزیراعظم چوہدری انوار الحق بھمبر سے، سردار عتیق احمد خان باغ سے جبکہ سابق وزیراعظم سردار تنویر الیاس نیلم اور باغ دونوں حلقوں سے شکست کھا گئے۔

دوسری جانب راجہ فاروق حیدر اور فیصل راٹھور اپنی نشستیں برقرار رکھنے میں کامیاب رہے۔

انتخابی نتائج میں مسلم کانفرنس، استحکام پاکستان پارٹی، جماعت اسلامی، ایم کیو ایم، جموں کشمیر پیپلز پارٹی اور جمعیت علماء اسلام (ف) بھی خاطر خواہ کامیابی حاصل نہ کرسکیں۔

سیاسی مبصرین کے مطابق آزاد کشمیر انتخابات کے نتائج نے خطے کی سیاسی صورتحال میں اہم تبدیلیوں کی نشاندہی کی ہے، جہاں مسلم لیگ ن اور پیپلز پارٹی نے واضح برتری حاصل کی ہے۔