تاجر برادری کے تمام جائز تحفظات دور کیے جائیں گے، ضیاءاللہ لانگو

کوئٹہ (ویب ڈیسک): صوبائی وزیر داخلہ میر ضیائ اللہ لانگو سے انجمن تاجران بلوچستان کے مرکزی صدر عبدالرحیم آغا کی قیادت میں تاجر برادری کے وفد نے اہم ملاقات کی۔ اس موقع پر معاون برائے محکمہ داخلہ بابر یوسفزئی اور ڈی سی کوئٹہ سمیت دیگر اعلٰی حکام بھی موجود تھے۔ملاقات کے دوران تاجر برادری نے اپنے شدید تحفظات کا اظہار کرتے ہوئے بتایا کہ بلوچستان کی قومی شاہراہوں پر ٹرکوں اور بلڈوزروں کو جلایا جا رہا ہے، جبکہ میٹروپولیٹن کارپوریشن سے متعلق بھی تاجروں کو مختلف مسائل اور خدشات کا سامنا ہے۔وزیر داخلہ میر ضیائ اللہ لانگو نے تاجر برادری کی بات سنتے ہوئے ان کے تمام جائز تحفظات کو فوری دور کرنے کی یقین دہانی کرائی۔ انہوں نے کہا کہ احتجاج ہر شہری کا جمہوری حق ہے اور تاجر ہڑتال ضرور کریں، لیکن مسائل کا حل حکومت کی اولین ذمہ داری ہے۔ قومی شاہراہوں کو محفوظ بنانے کے لیے ہنگامی بنیادوں پر اقدامات اٹھائے جا رہے ہیں۔وزیر داخلہ کا مزید کہنا تھا کہ افغانستان کی سرزمین بلوچستان میں دہشت گردی کے لیے استعمال ہو رہی ہے اور چند عناصر دشمن ملک کے ایمائ پر صوبے میں بدامنی پھیلانے کی کوشش کر رہے ہیں۔ انہوں نے واضح کیا کہ معصوم نوجوانوں اور خواتین کو نشانہ بنانا بلوچستان کی روایات کے خلاف ہے۔ملاقات کے اختتام پر طے پایا کہ تاجر برادری کے درپیش مسائل کے حتمی حل کے لیے کل دوبارہ اجلاس منعقد کیا جائے گا۔