کوئٹہ چہلم حضرت امام حسینؓ کے جلوس کے لیے فول پروف سیکیورٹی انتظامات مکمل، ایک ہزار سے زائد اہلکار تعینات

چہلم حضرت امام حسینؓ کے موقع پر مرکزی جلوس کی سیکیورٹی کو یقینی بنانے کے لیے کوئٹہ پولیس نے فول پروف انتظامات مکمل کر لیے ہیں۔ ایس ایس پی آپریشنز کوئٹہ ضیاءالحق مندوخیل کے مطابق جلوس کے روٹ پر ایک ہزار سے زائد پولیس افسران اور اہلکار تعینات کیے گئے ہیں تاکہ عزاداروں کی جان و مال کے تحفظ اور امن و امان کی صورتحال کو ہر صورت برقرار رکھا جا سکے۔انہوں نے بتایا کہ سیکیورٹی کے پیش نظر جلوس کے روٹ کے تمام داخلی اور خارجی راستوں کو سیل کر دیا گیا ہے، جبکہ شہریوں سے اپیل کی گئی ہے کہ وہ پولیس کے ساتھ مکمل تعاون کریں اور غیر ضروری طور پر جلوس کے روٹ پر آنے سے گریز کریں۔ایس ایس پی آپریشنز کے مطابق جلوس کی سیکیورٹی کے لیے پولیس، اے ٹی ایف، بی ڈی ایس، لیڈیز پولیس، ایلیٹ فورس، اسنائپرز اور دیگر قانون نافذ کرنے والے اداروں کے اہلکار مشترکہ طور پر فرائض انجام دیں گے۔انہوں نے مزید بتایا کہ جلوس کے روٹ پر واک تھرو گیٹس، میٹل ڈیٹیکٹرز، جدید سی سی ٹی وی مانیٹرنگ، سخت چیکنگ اور مسلسل نگرانی کے ذریعے فول پروف سیکیورٹی کو یقینی بنایا جائے گا تاکہ کسی بھی ناخوشگوار واقعے سے بروقت نمٹا جا سکے۔ایس ایس پی ضیاءالحق مندوخیل نے شہریوں سے اپیل کی کہ وہ متبادل راستے اختیار کریں، ٹریفک ہدایات پر عمل کریں اور کسی بھی مشکوک شخص یا سرگرمی کی فوری اطلاع پولیس کو دیں۔انہوں نے اس عزم کا اظہار کیا کہ کوئٹہ پولیس چہلم حضرت امام حسینؓ کے موقع پر امن و امان کے قیام اور عزاداروں کی حفاظت کے لیے تمام دستیاب وسائل بروئے کار لا رہی ہے، جبکہ شہریوں کا تعاون کامیاب سیکیورٹی انتظامات کے لیے نہایت اہم ہے۔