ورکرز ویلفیئر فنڈ مزدوروں کے رہائشی منصوبوں کے تحفظ کیلئے متحرک

ریگی للمہ پشاور میں مزدوروں کی ہاؤسنگ کالونی اور اراضی پر تجاوزات سے متعلق اعلیٰ سطحی اہم اجلاس منعقد

ورکرز ویلفیئر فنڈ کی گورننگ باڈی کی ہدایت پر سیکرٹری ورکرز ویلفیئر فنڈ جناب ذوالفقار احمد نے گورننگ باڈی کے معزز اراکین جناب فرخ شہزاد اور جناب عمر مسعود کے ہمراہ ریگی للمہ پشاور میں مزدوروں کی ہاؤسنگ کالونی اور متعلقہ اراضی پر تجاوزات سے متعلق امور کے جائزے کے لیے منعقدہ ایک اہم اجلاس میں شرکت کی۔

اجلاس کی صدارت سیکرٹری لیبر، خیبر پختونخوا، کیپٹن (ر)میاں عادل اقبال نے کی۔ اجلاس میں ریگی للمہ میں مزدوروں کی ہاؤسنگ کالونی، اراضی پر تجاوزات، منصوبے کی پیش رفت اور دیگر متعلقہ امور پر تفصیلی غور و خوض کیا گیا۔ شرکاء نے اس عزم کا اظہار کیا کہ تمام متعلقہ اداروں کے باہمی تعاون سے تجاوزات کے خاتمے، اراضی کے تحفظ اور ہاؤسنگ کالونی سے متعلق زیرِ التواء معاملات کو ترجیحی بنیادوں پر حل کیا جائے گا تاکہ مزدور برادری کو جلد از جلد اس منصوبے کے ثمرات میسر آ سکیں۔

اجلاس کے بعد سیکرٹری ورکرز ویلفیئر فنڈ جناب ذوالفقار احمد نے گورننگ باڈی کے اراکین جناب فرخ شہزاد اور جناب عمر مسعود کے ہمراہ کے پی کے ہائی ویز اتھارٹی کے منیجنگ ڈائریکٹر جناب سہیل ادریس کے دفتر کا دورہ بھی کیا۔ اس موقع پر باہمی دلچسپی کے متعدد اہم امور پر رسمی اور غیر رسمی گفتگو ہوئی۔

ورکرز ویلفیئر فنڈ مزدوروں کی فلاح و بہبود، ان کے رہائشی منصوبوں کے تحفظ اور تمام متعلقہ اداروں کے ساتھ مؤثر اشتراکِ عمل کے ذریعے مسائل کے بروقت اور پائیدار حل کے لیے پُرعزم ہے۔