کیچ میں مزدوروں کے قتل کی مذمت، دہشتگردوں کو انجام تک پہنچائیں گے، وزیراعلیٰ بلوچستان

کوئٹہ: وزیراعلیٰ بلوچستان میر سرفراز بگٹی نے ضلع کیچ میں فتنہ الہندوستان کے دہشتگردوں کے ہاتھوں معصوم مزدوروں کے بہیمانہ قتل کی شدید مذمت کرتے ہوئے کہا ہے کہ شہید ہونے والے افراد کسی ایک قوم یا صوبے سے نہیں بلکہ پاکستان کے شہری تھے، دہشتگردوں نے پاکستانیوں کو نشانہ بنایا۔

وزیراعلیٰ بلوچستان نے کہا کہ بلوچ روایات نہتے اور بے گناہ انسانوں کے قتل کی نہیں بلکہ عزت، مہمان نوازی اور بھائی چارے کی امین ہیں۔ دہشتگرد عناصر کا بلوچ قوم سے کوئی تعلق نہیں، یہ پاکستان کے اتحاد، امن اور ترقی کے دشمن ہیں۔

میر سرفراز بگٹی نے کہا کہ معصوم پاکستانیوں کے خون سے کھیلنے والے دہشتگردوں اور ان کے سہولت کاروں کو ہر صورت انجام تک پہنچایا جائے گا۔

انہوں نے کہا کہ پاکستان کے دشمن قوموں کے درمیان نفرت پیدا کرنا چاہتے ہیں، تاہم پوری قوم متحد ہو کر ان کے مذموم عزائم ناکام بنائے گی۔

وزیراعلیٰ بلوچستان نے عزم کا اظہار کیا کہ دہشتگردوں کو ہر محاذ پر شکست دی جائے گی اور ریاست کی رٹ کے قیام پر کوئی سمجھوتہ نہیں کیا جائے گا۔