آزاد کشمیر: میرپور ڈویژن کے 13 حلقوں میں عام انتخابات کل ہوں گے

میرپور: آزاد کشمیر کے میرپور ڈویژن کے تین اضلاع کے 13 حلقوں میں عام انتخابات کے لیے تیاریاں مکمل کر لی گئی ہیں، جبکہ پولنگ کل مقررہ وقت پر ہوگی۔

انتخابی حکام کے مطابق ڈی آر او آفس سے پولنگ سامان کی ترسیل شروع کر دی گئی ہے۔ بیلٹ پیپرز اور دیگر ضروری انتخابی سامان پریذائیڈنگ افسران کے حوالے کر دیا گیا، جو سخت سیکیورٹی میں متعلقہ پولنگ اسٹیشنز روانہ کر دیا گیا۔

پولنگ سامان کی منتقلی کے دوران پولیس اور دیگر قانون نافذ کرنے والے اداروں کے اہلکار سیکیورٹی فرائض انجام دیتے رہے، جبکہ تمام پولنگ اسٹیشنز تک سامان بروقت پہنچانے کے انتظامات مکمل کر لیے گئے ہیں۔

الیکشن حکام کا کہنا ہے کہ آزاد، منصفانہ اور پرامن انتخابات کے انعقاد کے لیے تمام انتظامات مکمل ہیں، جبکہ پولنگ کے دوران امن و امان برقرار رکھنے کے لیے سیکیورٹی کے خصوصی اقدامات کیے گئے ہیں۔