وزیراعلیٰ بلوچستان کا مستونگ آپریشن پر سکیورٹی فورسز کو خراجِ تحسین

کوئٹہ: وزیراعلیٰ بلوچستان میر سرفراز بگٹی نے مستونگ میں سکیورٹی فورسز کے کامیاب انٹیلی جنس بیسڈ آپریشن کو سراہتے ہوئے فورسز کو خراجِ تحسین پیش کیا ہے۔

اپنے بیان میں وزیراعلیٰ بلوچستان نے کہا کہ سکیورٹی فورسز نے بروقت اور پیشہ ورانہ کارروائی کرتے ہوئے دہشت گردوں کے عزائم کو ناکام بنایا۔ انہوں نے کہا کہ بلوچستان میں دہشت گردی کے خاتمے کے لیے سکیورٹی فورسز، پولیس، لیویز اور دیگر قانون نافذ کرنے والے ادارے بھرپور عزم کے ساتھ کارروائیاں جاری رکھے ہوئے ہیں۔

میر سرفراز بگٹی کا کہنا تھا کہ دہشت گردی کے خلاف پوری قوم اپنی بہادر سکیورٹی فورسز کے ساتھ کھڑی ہے اور امن دشمن عناصر کی ہر سازش کو ناکام بنایا جائے گا۔

وزیراعلیٰ بلوچستان نے کہا کہ بھارت کے سرپرست دہشت گرد گروہوں اور فتنہ الخوارج کے گٹھ جوڑ سے پاکستان کے امن اور استحکام کو نقصان نہیں پہنچایا جا سکتا۔

انہوں نے اس عزم کا اظہار کیا کہ بلوچستان میں پائیدار امن کے قیام اور عوام کے جان و مال کے تحفظ کے لیے ریاستی اداروں کو ہر ممکن تعاون فراہم کیا جاتا رہے گا۔