مستونگ: محکمہ تعلیم کے دو دفاتر میں آگ، سرکاری ریکارڈ اور کمپیوٹر جل گئے، تحقیقات شروع

مستونگ: ضلع مستونگ میں محکمہ تعلیم کے دو مختلف دفاتر میں آگ لگنے کے واقعات پیش آئے، جن کے نتیجے میں ریکارڈ رومز، کمپیوٹرز اور اہم سرکاری دستاویزات جل کر خاکستر ہوگئیں۔ پولیس اور متعلقہ اداروں نے واقعات کی تحقیقات شروع کر دی ہیں۔

تفصیلات کے مطابق پہلا واقعہ شاہی باغ میں واقع ڈسٹرکٹ ایجوکیشن آفیسر (ڈی ای او) فیمیل کے دفتر جبکہ دوسرا واقعہ بابو محلہ میں ڈپٹی ڈسٹرکٹ ایجوکیشن آفیسر (ڈی ڈی او) فیمیل کے دفتر میں پیش آیا۔ دونوں مقامات پر ایک ایک کمرہ آگ کی لپیٹ میں آیا۔

ابتدائی اطلاعات کے مطابق نامعلوم افراد نے مبینہ طور پر دفاتر میں داخل ہو کر آتش گیر مادہ چھڑکنے کے بعد آگ لگائی، جس کے باعث ریکارڈ رومز، کمپیوٹرز اور دیگر اہم سرکاری ریکارڈ مکمل طور پر تباہ ہوگیا۔

اطلاع ملنے پر پولیس اور دیگر متعلقہ اداروں کے اہلکار فوری طور پر موقع پر پہنچے اور شواہد اکٹھے کرکے مختلف پہلوؤں سے تحقیقات کا آغاز کر دیا۔

حکام کے مطابق فی الحال آگ لگنے کی وجوہات اور ذمہ دار عناصر کے بارے میں کوئی حتمی مؤقف سامنے نہیں آیا۔ واقعے کے حوالے سے مختلف امکانات کا جائزہ لیا جا رہا ہے، تاہم کسی بھی ممکنہ محرک یا مقصد سے متعلق تحقیقات مکمل ہونے سے قبل کوئی حتمی نتیجہ اخذ نہیں کیا جا سکتا۔

پولیس کا کہنا ہے کہ شواہد کی بنیاد پر ذمہ دار افراد کی شناخت اور گرفتاری کے لیے کارروائی جاری ہے، جبکہ تحقیقات مکمل ہونے کے بعد مزید حقائق سامنے آئیں گے۔