مستونگ حملہ: قانون کے محافظوں کو نشانہ بنانا ناقابلِ قبول ہے، ڈاکٹر ربابہ خان بلیدی

وزیراعلیٰ بلوچستان کی مشیر برائے ترقی نسواں ڈاکٹر ربابہ خان بلیدی نے مستونگ میں دہشت گردوں کی فائرنگ کے نتیجے میں سیشن جج عبدالحکیم کاکڑ اور ان کے گن مین محمد زمان کی شہادت پر گہرے دکھ اور افسوس کا اظہار کرتے ہوئے واقعے کی شدید مذمت کی ہے اپنے ایک بیان میں ڈاکٹر ربابہ خان بلیدی نے کہا کہ قانون اور انصاف کے محافظوں کو نشانہ بنانا نہایت افسوسناک اور ناقابلِ قبول عمل ہے۔ ایسے واقعات کا مقصد خوف و ہراس پھیلانا اور ریاستی اداروں کو کمزور کرنا ہے، تاہم دہشت گرد اپنے مذموم عزائم میں کبھی کامیاب نہیں ہوں گے انہوں نے شہداء کے اہلِ خانہ سے دلی تعزیت اور ہمدردی کا اظہار کرتے ہوئے دعا کی کہ اللہ تعالیٰ شہداء کے درجات بلند فرمائے، لواحقین کو صبرِ جمیل عطا کرے اور زخمیوں، بالخصوص ایڈیشنل سیشن جج طارق لاشاری، کو جلد مکمل صحت یاب کرے ڈاکٹر ربابہ خان بلیدی نے کہا کہ حکومت بلوچستان عوام کے جان و مال کے تحفظ اور صوبے میں پائیدار امن کے قیام کے لیے تمام متعلقہ اداروں کے ساتھ مکمل تعاون کر رہی ہے۔ انہوں نے کہا کہ دہشت گردی کے خاتمے اور قانون کی بالادستی کے لیے اجتماعی عزم اور قومی یکجہتی ناگزیر ہے انہوں نے کہا کہ بلوچستان کے عوام امن پسند ہیں اور دہشت گردی کے خلاف ریاست کے ساتھ کھڑے ہیں۔ حکومت امن و استحکام کے قیام اور دہشت گردی کے مکمل خاتمے کے لیے اپنی کوششیں جاری رکھے گی۔