قلات میں مسافر کوچ پر فائرنگ، سیکیورٹی فورسز کا سرچ آپریشن شروع

قلات: بلوچستان کے ضلع قلات میں بدامنی کا ایک اور واقعہ پیش آیا، جہاں گڈان ہوٹل کے قریب نامعلوم مسلح افراد نے کوئٹہ سے تربت جانے والی “المنیر” مسافر کوچ پر فائرنگ کر دی۔

ذرائع کے مطابق مسلح افراد نے شاہراہ پر گھات لگا کر کوچ کو اس وقت نشانہ بنایا جب وہ اپنے مقررہ روٹ پر سفر کر رہی تھی، جس سے مسافروں میں شدید خوف و ہراس پھیل گیا۔

واقعے کی اطلاع ملتے ہی لیویز، پولیس اور ریسکیو ٹیمیں فوری طور پر موقع پر پہنچ گئیں۔ سیکیورٹی اہلکاروں نے علاقے کو گھیرے میں لے کر شواہد اکٹھے کیے اور حملہ آوروں کی تلاش کے لیے سرچ آپریشن شروع کر دیا۔

حکام کے مطابق واقعے کی مزید تحقیقات جاری ہیں، جبکہ جانی نقصان یا زخمیوں سے متعلق تفصیلات سرکاری طور پر جاری نہیں کی گئی ہیں۔