جے یو آئی (ف) کا وکلا کنونشن جاری، اسلام آباد ہائی کورٹ بار ایسوسی ایشن کا اظہارِ لاتعلقی

اسلام آباد: اسلام آباد ہائی کورٹ بار ایسوسی ایشن نے جمعیت علمائے اسلام (ف) کے زیر اہتمام جاری وکلا کنونشن سے لاتعلقی کا اظہار کرتے ہوئے واضح کیا ہے کہ اس تقریب سے بار ایسوسی ایشن کا کوئی تعلق نہیں۔

اپنے بیان میں اسلام آباد ہائی کورٹ بار ایسوسی ایشن نے کہا کہ اسلام آباد میں منعقد ہونے والے مذکورہ سیاسی جماعت کے لائرز کنونشن میں بار کا نہ کوئی کردار ہے اور نہ ہی وہ اس تقریب کی حمایت یا تائید کرتی ہے۔

بار ایسوسی ایشن کا کہنا ہے کہ یہ تاثر درست نہیں کہ وہ کسی سیاسی جماعت کے پروگرام سے منسلک ہے یا اس تقریب کا حصہ ہے۔

اسلام آباد ہائی کورٹ بار ایسوسی ایشن کے صدر بیرسٹر قاسم نواز عباسی نے کہا کہ بار آئین کی بالادستی، عدلیہ کی آزادی اور قانون کی حکمرانی کے اصولوں پر اپنے مؤقف پر قائم ہے اور ان بنیادی اقدار کے تحفظ کے لیے اپنا کردار ادا کرتی رہے گی۔