نائب وزیراعظم سے عبدالمالک بلوچ، نیشنل پارٹی کے پارلیمانی ارکان کی ملاقات،مختلف امور پر تبادلہ خیال

اسلام آباد: نائب وزیراعظم و وزیر خارجہ سینیٹر اسحاق ڈار سے نیشنل پارٹی کے صدر ڈاکٹر عبدالمالک بلوچ اور پارٹی کے پارلیمانی ارکان نے ملاقات کی، جس میں بلوچستان کی مجموعی صورتحال، عوام کو درپیش مسائل اور ترقیاتی منصوبوں پر تفصیلی تبادلۂ خیال کیا گیا۔

ملاقات کے دوران اسحاق ڈار نے کہا کہ وفاقی حکومت آئینِ پاکستان کے دائرہ کار میں رہتے ہوئے بلوچستان کے عوام کی معاشی ترقی، خوشحالی اور جائز مطالبات کے حل کے لیے پرعزم ہے۔ انہوں نے کہا کہ حکومت صوبے میں امن، استحکام اور ترقی کے لیے تمام متعلقہ فریقوں کے ساتھ تعاون جاری رکھے گی۔

اس موقع پر ڈاکٹر عبدالمالک بلوچ نے کہا کہ نیشنل پارٹی بلوچستان کے عوام کی بہتری، فلاح و بہبود اور دیرپا استحکام کے لیے تمام سیاسی اور ریاستی فریقوں کے ساتھ مل کر کام کرنے کے لیے تیار ہے۔

انہوں نے مزید کہا کہ صوبے میں سرگرم مسلح عناصر کو بلوچستان کے عوام کی حمایت یا اخلاقی جواز حاصل نہیں، اور مسائل کے حل کے لیے سیاسی مکالمہ اور جمہوری راستہ ہی مؤثر ذریعہ ہے۔

ملاقات میں وفاقی وزیر برائے بین الصوبائی رابطہ رانا ثناء اللہ خان اور وزیراعظم کے معاونِ خصوصی طارق باجوہ بھی شریک تھے۔