سوراب: کلغلی میں مسافر کوچ پر فائرنگ، کمسن بچی سمیت 2 افراد زخمی

سوراب: بلوچستان کے ضلع سوراب کے پہاڑی علاقے کلغلی میں نامعلوم مسلح افراد کی فائرنگ سے مسافر کوچ میں سوار کمسن بچی سمیت دو افراد زخمی ہو گئے۔

ذرائع کے مطابق پنجگور سے سوراب کے راستے کوئٹہ جانے والی مسافر کوچ پر پیر کی دوپہر تقریباً 12:30 بجے کلغلی کے مقام پر نامعلوم مسلح افراد نے اندھا دھند فائرنگ کر دی۔

فائرنگ کے نتیجے میں صلاح الدین ولد عبداللہ گردن پر گولی کے ٹکڑے لگنے سے زخمی ہو گئے، جبکہ کمسن بچی صبین بنت عبداللہ کے پاؤں میں دو گولیاں لگیں۔

واقعے کی اطلاع ملتے ہی ریسکیو 1122 کی ٹیم موقع پر پہنچ گئی اور زخمیوں کو ابتدائی طبی امداد فراہم کرنے کے بعد مزید علاج کے لیے قریبی اسپتال منتقل کر دیا۔

فائرنگ کے بعد قانون نافذ کرنے والے اداروں نے علاقے کو گھیرے میں لے کر شواہد اکٹھے کرنا شروع کر دیے ہیں، جبکہ حملہ آور فرار ہونے میں کامیاب ہو گئے۔ واقعے کی وجوہات اور ملزمان کی تلاش کے لیے تحقیقات جاری ہیں۔