ماشکیل فائرنگ واقعہ انتہائی افسوسناک اور قابل مذمت ہے، شاہد رند

کوئٹہ: بلوچستان حکومت کے ترجمان شاہد رند نے ماشکیل میں فائرنگ کے افسوسناک واقعے میں پانچ افراد کے جاں بحق ہونے پر گہرے دکھ اور افسوس کا اظہار کرتے ہوئے واقعے کی شدید مذمت کی ہے۔

اپنے بیان میں شاہد رند نے کہا کہ حکومت بلوچستان نے واقعے کا فوری نوٹس لیتے ہوئے شفاف اور غیر جانبدار تحقیقات کا حکم دے دیا ہے۔ انہوں نے کہا کہ معصوم اور بے گناہ شہریوں کے قتل میں ملوث عناصر قانون کی گرفت سے نہیں بچ سکیں گے۔

انہوں نے بتایا کہ قانون نافذ کرنے والے اداروں کو ہدایت جاری کر دی گئی ہے کہ واقعے میں ملوث ملزمان کو فوری گرفتار کرکے انہیں قانون کے مطابق کیفر کردار تک پہنچایا جائے۔

شاہد رند کا کہنا تھا کہ حکومت بلوچستان متاثرہ خاندانوں کے غم میں برابر کی شریک ہے اور انہیں ہر ممکن تعاون فراہم کیا جائے گا۔ انہوں نے کہا کہ صوبے میں امن و امان کو خراب کرنے کی کسی بھی سازش کو کامیاب نہیں ہونے دیا جائے گا۔

ترجمان بلوچستان حکومت نے کہا کہ ریاست شہریوں کے جان و مال کے تحفظ کو ہر صورت یقینی بنائے گی، جبکہ خوف و ہراس پھیلانے والے عناصر کے خلاف بھرپور کارروائیاں جاری رہیں گی۔ حکومت عوام کے تحفظ، انصاف کی فراہمی اور امن کے قیام کے لیے تمام دستیاب وسائل بروئے کار لا رہی ہے۔