پانی کی عدم دستیابی کے باعث لاکھوں ایکڑ زرعی اراضی متاثر ہو رہی ہے،میر صفی اللہ خان رخشانی

گنداخہ:(نامہ نگار فریداحمد) معروف سیاسی و شخصیت ڈھوری شاخ کے زمیندار میر صفی اللہ خان رخشانی نے کہا ہے کہ کھیرتھر کینال میں پانی کی مسلسل قلت کے باعث ضلع اوستہ محمد اور اس کے ملحقہ وسیع زرعی علاقے شدید بحران سے دوچار ہیں،انہوں نے کہا کہ پانی کی عدم دستیابی کے سبب لاکھوں ایکڑ زرعی اراضی متاثر ہو رہی ہے جبکہ خریف سیزن، خصوصاً چاول کی فصل، شدید خطرات سے دوچار ہے ان خیالات کا اظہار انھوں تحصیل پریس کلب گنداخہ کے صحافیوں سے گفتگو کرتے ہوئے انہوں نے کہا کہ کھیرتھر کینال سے نکلنے والی گنداخہ شاخ، نورپور شاخ، سیر مائنر، قبو شاخ، مٹھڑی، ڈھوری شاخ اور دیگر ذیلی نہروں میں پانی نہ ہونے کے برابر ہے، جس کی وجہ سے کاشتکار شدید پریشانی کا شکار ہیں اور ان کی فصلیں سوکھنے لگی ہیں انہوں نے کہا کہ کھیرتھر کینال کے لیے بلوچستان کا مقررہ حصہ “چوبیس سو”کیوسک ہے، تاہم صوبے کو اس کے حصے کے مطابق پانی فراہم نہیں کیا جا رہا، جس کے باعث زرعی شعبہ تباہی کے دہانے پر پہنچ چکا ہے۔ ان کا کہنا تھا کہ محکمہ آبپاشی کے متعلقہ افسران نے متعدد مرتبہ اعلیٰ حکام سے رابطے کیے،اور پانی کے حصول کیلئے آئینی طریقہ کار پر احتجاج کیے لیکن تاحال مسئلے کا کوئی مؤثر حل سامنے نہیں آیا۔مہر صفی اللہ خان رخشانی نے کہا کہ کسان اس وقت سخت معاشی مشکلات کا سامنا کر رہے ہیں اور اگر فوری طور پر پانی کی فراہمی یقینی نہ بنائی گئی تو زرعی پیداوار اور مقامی معیشت کو ناقابلِ تلافی نقصان پہنچے گا۔انہوں نے وزیر اعلیٰ بلوچستان چیف سیکرٹری بلوچستان سے مطالبہ کیا کہ کھیرتھر کینال میں پانی کی قلت کا فوری نوٹس لیتے ہوئے بلوچستان کے آئینی اور قانونی حصے کے پانی کی فراہمی یقینی بنانے کے لیے ہنگامی اقدامات کیے جائیں۔ انہوں نے مزید کہا کہ صوبے کے آبی حقوق کے تحفظ کے لیے مؤثر اور سنجیدہ حکمتِ عملی اختیار کرنا وقت کی اہم ضرورت ہے۔