قلعہ عبداللہ: ڈپٹی کمشنر سے کامیاب مذاکرات، کوئٹہ۔چمن شاہراہ ہر قسم کی ٹریفک کے لیے بحال

قلعہ عبداللہ میں ڈپٹی کمشنر اور مظاہرین کے درمیان کامیاب مذاکرات کے بعد کوئٹہ۔چمن مرکزی شاہراہ ہر قسم کی ٹریفک کے لیے بحال کر دی گئی، جبکہ جاری احتجاج بھی ختم کر دیا گیا۔

ذرائع کے مطابق مذاکرات میں فریقین کے درمیان اتفاق رائے ہونے پر مظاہرین نے دھرنا ختم کر دیا، جس کے بعد کئی گھنٹوں سے بند شاہراہ پر ٹریفک کی روانی دوبارہ بحال ہو گئی اور مسافروں نے سکھ کا سانس لیا۔

دوسری جانب جاں بحق افراد کی میتیں پوسٹ مارٹم کے لیے کوئٹہ کے سول اسپتال منتقل کی جا رہی ہیں۔ ضلعی انتظامیہ کا کہنا ہے کہ پوسٹ مارٹم اور تحقیقات مکمل ہونے کے بعد واقعے سے متعلق مزید قانونی کارروائی عمل میں لائی جائے گی۔