حکومت کی توانائی بچت پالیسی میں نرمی، کریانہ سٹورز رات 10 بجے تک کھلے رہ سکیں گے

اسلام آباد: حکومت نے توانائی کے تحفظ اور کفایت شعاری اقدامات میں جزوی نرمی کرتے ہوئے ملک بھر کے چھوٹے گروسری اور کریانہ سٹورز کے اوقاتِ کار میں توسیع کا فیصلہ کر لیا ہے۔

نائب وزیراعظم و وزیر خارجہ سینیٹر اسحاق ڈار کی زیر صدارت فیول کنزرویشن اور اضافی کفایت شعاری اقدامات پر عملدرآمد کا جائزہ لینے کے لیے قائم کمیٹی کا اجلاس منعقد ہوا، جس میں مختلف وزارتوں کی جانب سے پیش کی گئی استثنیٰ کی درخواستوں اور جاری اقدامات کا تفصیلی جائزہ لیا گیا۔

اجلاس میں فیصلہ کیا گیا کہ ملک بھر کے چھوٹے کریانہ اور گروسری سٹورز ہفتے کے ساتوں دن رات 10 بجے تک کھلے رکھنے کی اجازت ہوگی، جس سے عوام اور کاروباری طبقے کو سہولت میسر آئے گی۔

کمیٹی نے یہ بھی سفارش کی کہ 13 جون 2026 کو ختم ہونے والے اضافی کفایت شعاری اقدامات کی مدت میں توسیع کرتے ہوئے اسے 30 جون 2026 تک بڑھا دیا جائے۔

عوامی سہولت کے پیش نظر وزارتِ خارجہ اور اس کے کراچی، لاہور، پشاور، کوئٹہ اور گجرات میں قائم رابطہ دفاتر میں قونصلر اٹیسٹیٹیشن خدمات جمعہ کے روز بھی جاری رکھنے کا فیصلہ کیا گیا ہے تاکہ شہریوں کو دستاویزات کی تصدیق کے لیے مزید آسانی فراہم کی جا سکے۔

اجلاس میں وزیراعظم کے معاونِ خصوصی، کابینہ ڈویژن، وزارتِ تجارت، وزارتِ پیٹرولیم، وزارتِ آئی ٹی کے سیکریٹریز سمیت دیگر اعلیٰ حکام نے شرکت کی اور توانائی بچت اقدامات کے مؤثر نفاذ پر تبادلہ خیال کیا۔