ایرانی پیٹرول کی وافر سپلائی کوئٹہ پہنچنا شروع

کوئٹہ: ایرانی پیٹرول کی وافر مقدار میں سپلائی کوئٹہ پہنچنا شروع ہوگئی ہے جس کے بعد شہر میں پیٹرول کی دستیابی بہتر ہونے لگی ہے۔ گزشتہ چند روز سے پیٹرول پمپس پر لگنے والی لمبی قطاروں اور رش میں نمایاں کمی دیکھی جا رہی ہے جبکہ ٹریفک کا نظام بھی معمول پر آنا شروع ہوگیا ہے۔

شہریوں کے مطابق ایندھن کی فراہمی میں بہتری آنے سے انہیں شدید مشکلات سے نجات مل رہی ہے۔ پیٹرول پمپس پر گاڑیوں اور موٹر سائیکلوں کی لمبی قطاریں ختم ہونے لگی ہیں اور بیشتر مقامات پر معمول کے مطابق ایندھن فراہم کیا جا رہا ہے۔

ذرائع کے مطابق ایرانی پیٹرول کی مسلسل آمد سے آئندہ دنوں میں سپلائی مزید مستحکم ہونے کی توقع ہے، جس سے شہر میں ایندھن کی قلت مکمل طور پر ختم ہونے کے امکانات روشن ہوگئے ہیں۔ شہریوں نے متعلقہ حکام سے مطالبہ کیا ہے کہ پیٹرول کی بلا تعطل فراہمی کو یقینی بنایا جائے تاکہ مستقبل میں ایسی صورتحال دوبارہ پیدا نہ ہو۔