شیخ الحدیث مولانا محمد ادریس شہید کے قاتلوں کی عدم گرفتاری کے خلاف جے یو آئی کا احتجاجی مظاہرہ

شیخ الحدیث مولانا محمد ادریس شہید ایک عظیم مذہبی و علمی شخصیت تھے-مفتی عبدالکریم

میرواہ گورچانی (نمائندہ خصوصی)گلوبل ٹائمز میڈیا یورپ کے مطابق جمعیت علمائے اسلام یونٹ میرواہ گورچانی کی جانب سے معروف مذہبی شخصیت شیخ الحدیث مولانا محمد ادریس شہید کے قاتلوں کی عدم گرفتاری کے خلاف بعد نماز جمعہ مکی مسجد اڈے والی کے سامنے احتجاجی مظاہرہ کیا گیا۔ مظاہرین نے ہاتھوں میں بینرز اور پلے کارڈز اٹھا رکھے تھے جن پر قاتلوں کی فوری گرفتاری اور انصاف کی فراہمی کے مطالبات درج تھے۔احتجاجی ریلی میں علماء کرام،دینی مدارس کے طلبہ، سیاسی و مذہبی کارکنان اور شہریوں کی بڑی تعداد نے شرکت کی۔مظاہرے کی قیادت جمعیت علمائے اسلام کے رہنماؤں مفتی عبدالکریم اور قاری غلام حیدر نے کی، جبکہ سنی رابطہ کونسل کے رہنماؤں خلیل احمد فاروقی، مفتی خورشید اور مفتی محمد عمیر سمیت دیگر علماء کرام نے بھی خطاب کیا- اس موقع پر مقررین نے اپنے خطاب میں کہا کہ شیخ الحدیث مولانا محمد ادریس شہید ایک عظیم مذہبی و علمی شخصیت تھے جنہوں نے اپنی پوری زندگی دین اسلام کی خدمت، اصلاح معاشرہ اور دینی تعلیمات کے فروغ کے لیے وقف کر رکھی تھی۔ان کے بہیمانہ قتل نے نہ صرف مذہبی حلقوں بلکہ پورے پاکستان کے عوام کو شدید صدمے سے دوبچار کیا ہے-علماء کرام نے کہا کہ واقعے کو کافی روز گزر جانے کے باوجود قاتلوں کی عدم گرفتاری قانون نافذ کرنے والے اداروں کی کارکردگی پر سوالیہ نشان ہے۔ انہوں نے مطالبہ کیا کہ واقعے میں ملوث عناصر کو فوری طور پر گرفتار کرکے قرار واقعی سزا دی جائے تاکہ عوام میں پائی جانے والی بے چینی اور اضطراب کا خاتمہ ہو سکے۔مظاہرے کے اختتام پر شیخ الحدیث مولانا محمد ادریس شہید کے درجات کی بلندی، ملک میں امن و استحکام اور انصاف کی فراہمی کے لیے خصوصی دعا بھی کی گئی-