شہباز صاحب پیٹرول کی قیمت میں کمی کا فائدہ عوام کو پہنچایا جائے، نواز شریف کی ملاقات میں گفتگو

پاکستان مسلم لیگ (ن) کے صدر اور سابق وزیراعظم نواز شریف نے وزیراعظم شہباز شریف سے کہا ہے کہ پیٹرولیم مصنوعات کی قیمتوں میں کمی کا فائدہ براہِ راست عوام تک پہنچایا جائے اور مہنگائی پر قابو پانے کے لیے مؤثر اقدامات کیے جائیں۔

وزیراعظم شہباز شریف نے جاتی امرا میں نواز شریف سے ملاقات کی، جو تقریباً ڈیڑھ گھنٹے جاری رہی۔ ملاقات کے دوران شہباز شریف نے انہیں ملک کی مجموعی سیاسی اور معاشی صورتحال سے آگاہ کیا۔

اس موقع پر نواز شریف نے کہا کہ شہباز صاحب، پیٹرولیم مصنوعات کی قیمتوں میں کمی کا فائدہ عوام کو ملنا چاہیے۔ مہنگائی کو کنٹرول کرنا ہی عوام کو ریلیف فراہم کرنے کے مترادف ہے۔

انہوں نے کہا کہ ایسی پالیسیاں بنائی جائیں جن سے روزمرہ استعمال کی اشیا کی قیمتوں میں کمی آئے۔ مسلم لیگ (ن) کی کوشش رہی ہے کہ ایسی پالیسیاں تشکیل دی جائیں جن کا براہِ راست فائدہ عوام تک پہنچے۔

ملاقات کے بعد وزیراعظم شہباز شریف جاتی امرا سے واپس روانہ ہوگئے۔