یومِ صحافت: ڈپٹی کمشنر کیچ کا تربت پریس کلب کا دورہ، صحافیوں سے اظہارِ یکجہتی

تربت:(نامہ نگار)عالمی یومِ صحافت ڈپٹی کمشنر کیچ یاسر اقبال دشتی کا تربت پریس کلب کا دورہ، صحافیوں سے اظہارِ یکجہتی
ڈپٹی کمشنر کیچ یاسر اقبال دشتی نے یومِ صحافت کے موقع پر تربت پریس کلب کا دورہ کیا اور صحافی برادری سے یکجہتی کا اظہار کرتے ہوئے ان کی سماجی بہتری کے لیے خدمات کو سراہا۔
دورے کے دوران تربت پریس کلب کے جنرل سیکرٹری نور شاہ نور، فنانس سیکرٹری مقبول ناصر اور سینئر صحافی طارق مسعود نے ڈپٹی کمشنر کو تربت کی صحافتی تاریخ اور پس منظر سے آگاہ کیا اور پریس کلب کو درپیش مسائل پر تفصیلی گفتگو کی۔
اس موقع پر تربت پریس کلب کے جوائنٹ سیکریٹری ایاز اسلم، الطاف بلوچ، زاھد دشتی، یلان زامرانی، مبارک بلوچ، امجد مراد، اسد بلوچ و دیگر بھی موجود تھے۔
اس دوران صحافیوں نے عالمی یومِ صحافت کی مناسبت سے مطالبہ کیا کہ تربت پریس کلب کی عمارت، جس پر محکمہ انڈسٹری اینڈ کامرس کا گزشتہ کئی سالوں سے قبضہ ہے واگزار کرائی جائے۔ مزید برآں صحافیوں نے زیرِ تعمیر نئی عمارت کا معائنہ بھی کرایا اور ڈیجیٹل لائبریری و اسٹوڈیو کے لیے ضروری آلات کی فراہمی کا مطالبہ کیا۔
صحافیوں نے حالیہ دنوں میں ڈپٹی کمشنر کیچ کی جانب سے عوامی سہولت کے لیے کیے گئے اقدامات کو سراہتے ہوئے پٹرول و ڈیزل اور مرغی کی قیمتوں میں توازن لانے کی کوششوں کو قابلِ تحسین قرار دیا۔
ڈپٹی کمشنر یاسر اقبال دشتی نے اس موقع پر گفتگو کرتے ہوئے صحافیوں کے کردار کو سراہا اور جشنِ بہاراں کیچ فیسٹیول 2026 کی کامیابی میں میڈیا کے مثبت کردار پر خصوصی شکریہ ادا کیا۔ انہوں نے یقین دہانی کرائی کہ پریس کلب کی ڈیجیٹل لائبریری اور اسٹوڈیو کے قیام کے لیے 10 مئی سے قبل درخواست فراہم کی جائے جس پر ضلعی انتظامیہ ضروری اقدامات اٹھائے گی۔