ڈپٹی کمشنر کوئٹہ کا تجاوزات کے خلاف آپریشن مزید تیز اور مؤثر بنانے کی ہدایت

ڈپٹی کمشنر کوئٹہ مہراللہ بادینی کے زیر صدارت کوئٹہ میں میٹروپولیٹن کی لیز شدہ پراپرٹی، زیرِ لیز پراپرٹیز، اور ختم ہونے والی لیز پراپرٹیز کے حوالے سے ایک اہم اجلاس منعقد ہوا۔ اجلاس میں ہیڈ ایڈمنسٹریٹر میٹروپولیٹن زاہد خان خلجی، میٹروپولیٹن کے لا آفیسر، چیف میونسپل آفیسر (CMO) سمیت دیگر متعلقہ افسران نے شرکت کی۔

اجلاس کے دوران میٹروپولیٹن کی ملکیتی پراپرٹیز، جو مختلف افراد کو لیز پر دی گئی ہیں، کے حوالے سے تفصیلی بریفنگ دی گئی۔ بریفنگ میں لیز کی مدت، شرائط، ختم ہونے والی لیزز، اور ان پراپرٹیز کو واگزار کرانے کے طریقہ کار پر تفصیل سے غور کیا گیا۔

اس موقع پر شہر بھر میں جاری تجاوزات کے خلاف مشترکہ آپریشن کی پیش رفت، حاصل شدہ کامیابیوں اور درپیش چیلنجز پر بھی تبادلہ خیال کیا گیا۔ ڈپٹی کمشنر نے تجاوزات کے خلاف جاری آپریشن کو مزید تیز اور مؤثر بنانے کی ہدایات جاری کیں۔

، میٹروپولیٹن کی تمام پراپرٹیز کا مکمل اور جامع ڈیٹا مرتب کرکے آئندہ ہفتے پیش کرنے کی ہدایت کی گئی تاکہ آئندہ کی حکمت عملی کو مؤثر انداز میں آگے بڑھایا جا سکے۔