کوئٹہ: 2 ہزار سے زائد افراد کی ن لیگ میں شمولیت، پارٹی بلوچستان میں مزید مضبوط ہوگی، جمال شاہ کاکڑ

کوئٹہ: پاکستان مسلم لیگ (ن) بلوچستان کے جنرل سیکرٹری و رکن قومی اسمبلی جمال شاہ کاکڑ نے کہا ہے کہ قائد میاں محمد نواز شریف اور پاکستان مسلم لیگ (ن) کی مقبولیت میں اضافہ ہو رہا ہے، 2 ہزار سے زائد افراد کی پارٹی میں شمولیت سے مسلم لیگ (ن) بلوچستان میں مزید مضبوط اور مستحکم ہوگی۔ان خیالات کا اظہار انہوں نے کوئٹہ میں شمولیتی جلسہ عام سے خطاب کرتے ہوئے کیا۔ اس موقع پر پاکستان مسلم لیگ (ن) کے صوبائی و ضلعی عہدیداران، پارٹی رہنماؤں اور کارکنوں کی بڑی تعداد موجود تھی۔جمال شاہ کاکڑ نے کہا کہ بڑی تعداد میں لوگوں کی مسلم لیگ (ن) میں شمولیت اس بات کا مظہر ہے کہ عوام قائد میاں محمد نواز شریف کی قیادت اور مسلم لیگ (ن) کی پالیسیوں پر اعتماد کا اظہار کر رہے ہیں۔انہوں نے کہا کہ نئے شامل ہونے والے افراد کو پارٹی میں خوش آمدید کہتے ہیں اور ان کی شمولیت سے پارٹی کی تنظیمی قوت میں اضافہ ہوگا۔انہوں نے کہا کہ مسلم لیگ (ن) ملک کی ترقی، خوشحالی اور عوام کی فلاح و بہبود کے لیے اپنا کردار ادا کر رہی ہے، بلوچستان کی ترقی اور عوام کو درپیش مسائل کا حل پارٹی کی ترجیحات میں شامل ہے۔جمال شاہ کاکڑ نے کہا کہ مسلم لیگ (ن) کے کارکن متحد ہو کر پارٹی کو بلوچستان کے تمام اضلاع میں مزید فعال اور مضبوط بنائیں گے۔ انہوں نے اس عزم کا اظہار کیا کہ بلوچستان کو پاکستان مسلم لیگ (ن) کا گڑھ بنایا جائے گا اور عوامی رابطہ مہم کو مزید وسعت دی جائے گی۔انہوں نے نئے شامل ہونے والے کارکنوں پر زور دیا کہ وہ پارٹی کے منشور اور قائدین کے پیغام کو عوام تک پہنچانے کے لیے اپنا بھرپور کردار ادا کریں۔