ویٹرنری شعبہ انسانی و حیوانی صحت کے باہمی ربط کو مضبوط بنانے میں بنیادی کردار ادا کر رہا ہے، وزیر اعلیٰ بلوچستان

کوئٹہ: ورلڈ ویٹرنری ڈے کے موقع پر وزیر اعلیٰ بلوچستان میر سرفراز بگٹی نے ویٹرنری ماہرین کو خراجِ تحسین پیش کرتے ہوئے کہا ہے کہ ویٹرنری شعبہ انسانی و حیوانی صحت کے باہمی ربط کو مضبوط بنانے میں بنیادی کردار ادا کر رہا ہے۔ انہوں نے کہا کہ بلوچستان میں اینیمل ہیلتھ کے شعبے کو مستحکم بنانے کے ساتھ ویکسین کی مقامی تیاری کی جانب پیش رفت جاری ہے تاکہ مویشیوں کو مختلف بیماریوں سے محفوظ بنایا جا سکے۔

وزیر اعلیٰ نے کہا کہ لائیواسٹاک سیکٹر کی بہتری اور پیداوار میں اضافے کے لیے جدید اصلاحی پالیسیاں متعارف کروائی جا رہی ہیں جبکہ موسمیاتی تغیرات کے پیش نظر مویشیوں کی مقامی نسلوں کا تحفظ ناگزیر ہو چکا ہے۔ انہوں نے مزید کہا کہ پبلک پرائیویٹ پارٹنرشپ کے تحت لائیواسٹاک فارمز کو جدید خطوط پر استوار کیا جا رہا ہے اور زرعی پالیسی کے تحت ویلیو ایڈیشن اور برآمدات کے فروغ پر خصوصی توجہ دی جا رہی ہے۔

ان کا کہنا تھا کہ گوشت اور دودھ کی معیاری پیداوار کے لیے ویٹرنری لیبارٹریز کو اپ گریڈ کیا جا رہا ہے جبکہ اینٹی مائیکروبیل ریزسٹنس جیسے چیلنج سے نمٹنے میں ویٹرنری ماہرین کا کردار انتہائی اہم ہے۔ انہوں نے کہا کہ ڈیری سیکٹر میں خواتین کو بااختیار بنانے، موبائل ویٹرنری سروسز کے ذریعے مویشی پال حضرات کو گھر کی دہلیز پر سہولیات فراہم کرنے اور زونوٹک بیماریوں کی نگرانی کے لیے جدید ڈیجیٹل نظام متعارف کروانے کے اقدامات جاری ہیں۔

وزیر اعلیٰ بلوچستان نے اس عزم کا اعادہ کیا کہ مال مویشیوں کی مقامی نسلوں کا جینیاتی تحفظ صوبے کی معیشت اور ثقافت کے لیے نہایت اہم ہے اور حکومت اس شعبے کی ترقی کے لیے تمام ممکنہ وسائل بروئے کار لا رہی ہے۔