امارات کو رقم کی واپسی، ملکی صنعتکاروں کا 2 ارب ڈالر کا فنڈ اسٹیٹ بینک میں جمع کروانے پر غور

آل پاکستان ٹیکسٹائل ملز ایسوسی ایشن (اپٹما) کے صنعت کارو ں نے 2 ارب ڈالر کا فنڈ اسٹیٹ بینک میں جمع کروانے پر غور کردیا۔

اپٹما نے متحدہ عرب امارات کی رقم کی واپسی کے بعد حکومت کو متبادل حل دے دیا۔ لاہور سے جاری بیان میں چیئرمین اپٹما کامران ارشد نےکہاکہ ہم حکومت کے شانہ بشانہ کھڑے ہیں، کوئی مسئلہ نہیں آنے دیں گے۔

ان کا کہنا تھاکہ امن مذاکرات کے بعد وزیراعظم سےمل کر اس مسئلے کا حل نکال لیں گے، سب سے پہلے پاکستان، اپٹما نے ہمیشہ اس عہد کو نبھایا ہے۔

انہوں نے مزید کہا کہ پاکستان آئی ایم ایف کی تمام شرائط پوری کر چکا ہے، برآمدات تیزی سے بڑھ رہی ہیں۔

خیال رہے کہ پاکستان نے متحدہ عرب امارات کا قرض واپس کرنے کا فیصلہ کیا ہے، پاکستان 2 ارب ڈالر اسی مہینے کے آخر میں ابوظبی کو واپس کرے گا، یہ رقم پاکستان کے اکاؤنٹ میں سیف ڈپازٹ کے طور پر موجود تھی۔