لورالائی میں بارش کے بعد ڈپٹی کمشنر کا ہنگامی دورہ، متاثرین سے ملاقات

حالیہ بارشوں کے نتیجے میں ندی نالوں میں طغیانی اور ڈیموں میں پانی کی آمد کے بعد ڈپٹی کمشنر لورالائی، کیپٹن (ر) محمد حسیب شجاع نے ہنگامی بنیادوں پر مختلف علاقوں کا دورہ کر کے صورتحال کا جائزہ لیا۔

ڈپٹی کمشنر نے ایڈیشنل ڈپٹی کمشنر محمد اسماعیل مینگل اور اسسٹنٹ کمشنر بوری ندیم اکرم کے ہمراہ لورالائی سٹی اور کھچ عمقزئی سمیت دیگر متاثرہ علاقوں کا معائنہ کیا۔

اس موقع پر انہوں نے مقامی افراد سے ملاقات کی، ان کے مسائل سنے اور نقصانات کا تخمینہ لگایا۔

ڈپٹی کمشنر نے متعلقہ حکام کو ہدایت جاری کی کہ ریلیف سرگرمیوں کو مزید تیز کیا جائے اور متاثرین کو فوری امداد فراہم کی جائے۔ انہوں نے ضلعی انتظامیہ اور پی ڈی ایم اے کو الرٹ رہنے اور ہنگامی اقدامات یقینی بنانے کی بھی تاکید کی۔

دورے کے دوران مقامی لوگوں نے ڈپٹی کمشنر کی بروقت آمد اور براہِ راست مسائل سننے کے اقدام کو سراہتے ہوئے امید ظاہر کی کہ ان کے مسائل اعلیٰ حکام تک پہنچا کر مؤثر حل نکالا جائے گا۔