افغان مہاجرین کے نام پر شہریوں کی گرفتاری،مرکزی تنظیم تاجران بلوچستان کا شدید رد عمل

مرکزی تنظیم تاجران بلوچستان کے ترجمان کاشف حیدری، محمد مہدی ہزارہ، محمد علی، زیشان ہزارہ، عزت اللہ کاظمی، الیاس علی زاہدی، جان محمد ہزارہ، محمد نبی، سلیمان علی، محمد اکرم اور دیگر رہنماؤں نے مشترکہ بیان میں کہا ہے کہ افغان مہاجروں کی گرفتاری کے نام پر شہریوں اور تاجروں کو متاثر کرنے کا سلسلہ انتہائی تشویشناک اور غیر منصفانہ ہے۔ مختلف علاقوں سے روزانہ کی بنیاد پر رپورٹس موصول ہو رہی ہیں جن میں پولیس اور قانون نافذ کرنے والے ادارے افغان مہاجرین کے نام پر پاکستانی شہریوں، حتیٰ کہ کم عمر افراد جن کے شناختی کارڈ بھی مکمل نہیں، کو گرفتار کر رہے ہیں، جو کسی بھی صورت قابل قبول نہیں۔ یہ رویہ نہ صرف شہریوں کی روزمرہ زندگی کو متاثر کر رہا ہے بلکہ کاروباری ماحول میں بھی مشکلات پیدا کر رہا ہے۔ رہنماؤں نے کہا کہ ایسے اقدامات میں اعتدال، ذمہ داری اور احتیاط کے اصولوں پر عمل انتہائی ضروری ہے تاکہ بے گناہ شہری اور تاجران بلاوجہ متاثر نہ ہوں اور شہر میں کاروباری سرگرمیاں بغیر رکاوٹ جاری رہ سکیں۔ انہوں نے مزید کہا کہ افغان مہاجرین کی گرفتاری کے عمل میں قانونی تقاضوں اور شفافیت کو ملحوظ خاطر رکھا جائے تاکہ کسی بھی شہری کے حقوق مجروح نہ ہوں اور امن و امان قائم رہے۔ تاجران کی معاشی سرگرمیاں اور شہریوں کا اعتماد اس بات پر منحصر ہے کہ قانون نافذ کرنے والے ادارے اپنے اقدامات میں انصاف اور توازن کو یقینی بنائیں۔

Browse Posts

ریڑھیوں کیلئے متبادل جگہ مختص کرکے رجسٹریشن کی جائیگی ،شاہزیب کاکڑ

غیر رجسٹرڈ ادارے قانونی حیثیت کھو دیں گے، ڈپٹی کمشنر کوئٹہ مہر اللہ بادینی

منافع خوروں کیخلاف سخت کارروائیاں کی جائیں،ڈی سی کوئٹہ