جموں میں فاروق عبداللہ قاتلانہ حملے میں محفوظ، حملہ آور گرفتار

جموں میں فاروق عبداللہ قاتلانہ حملے میں محفوظ، حملہ آور گرفتار

بھارتی زیر انتظام جموں و کشمیر میں نیشنل کانفرنس کے صدر اور سابق وزیر اعلیٰ Farooq Abdullah ایک قاتلانہ حملے میں بال بال بچ گئے۔

رپورٹس کے مطابق واقعہ Jammu میں ایک شادی کی تقریب کے دوران پیش آیا جہاں ایک شخص نے قریب سے فائرنگ کرنے کی کوشش کی۔

بتایا جاتا ہے کہ حملہ آور چند قدم کے فاصلے سے فاروق عبداللہ کے پیچھے پہنچا اور انتہائی قریب سے گولی چلانے کی کوشش کی تاہم نشانہ خطا ہو گیا جس کے باعث وہ محفوظ رہے۔

عینی شاہدین کے مطابق واقعے کے فوراً بعد تقریب میں موجود افراد نے حملہ آور کو قابو کر لیا۔ سوشل میڈیا پر سامنے آنے والی ویڈیوز میں دیکھا جا سکتا ہے کہ مشتعل ہجوم نے ملزم کو پکڑنے کے بعد تشدد کا نشانہ بھی بنایا۔

پولیس کے مطابق ملزم کی شناخت کمل جموال کے نام سے ہوئی ہے جو پرانی منڈی کا رہائشی بتایا جاتا ہے۔ حکام کے مطابق ملزم کی عمر تقریباً 65 سال ہے اور اسے فوری طور پر حراست میں لے لیا گیا ہے۔

ابتدائی تفتیش کے دوران ملزم نے دعویٰ کیا کہ وہ گزشتہ تقریباً بیس سال سے اس موقع کا انتظار کر رہا تھا۔

واقعے کے بعد سیکیورٹی اداروں نے علاقے کو گھیرے میں لے کر مزید تحقیقات شروع کر دی ہیں جبکہ فاروق عبداللہ کو سخت سیکیورٹی میں محفوظ مقام پر منتقل کر دیا گیا ہے۔