نازیہ مصطفےٰ
قومی سلامتی کا تصور اب صرف سرحدوں کے دفاع تک محدود نہیں رہا۔ بدلتی ہوئی جنگی حکمت عملی، ٹیکنالوجی کی برق رفتاری اور ملٹی ڈومین خطرات نے دفاع کے مفہوم کو وسعت دے دی ہے۔ ایسے ماحول میں پاک فضائیہ نے گزشتہ ایک دہائی کے دوران جس جامع جدیدیت، خود انحصاری اور بصیرت افروز قیادت کا مظاہرہ کیا ہے، وہ پاکستان کی دفاعی حکمت عملی کا مرکزی ستون بن چکا ہے۔
یہ امر بڑی اہمیت کا حامل ہے کہ پاک فضائیہ نے جدیدیت کی جانب سفر کا آغاز منظم انداز میں کیا۔ گزشتہ دس برسوں میں پاک فضائیہ نے مرحلہ وار اور مربوط انداز میں اپنی قوت کو جدید خطوط پر استوار کیا ہے۔ جدید لڑاکا طیاروں کی شمولیت، بغیر پائلٹ فضائی نظام، مربوط ایئر ڈیفنس نیٹ ورک اور پریسیژن گائیڈڈ امیونیشنز کی شمولیت نے فضائی قوت کو نئی جہت دی ہے۔ اس جدیدیت کا مقصد صرف ہتھیاروں کا اضافہ نہیں بلکہ ایک مکمل، مربوط اور نیٹ ورک سینٹرک فورس کی تشکیل تھا۔
ایئر ڈیفنس سسٹمز کی اپ گریڈیشن نے فضائی نگرانی اور ردعمل کے وقت کو کم سے کم کردیا ہے۔ جدید ریڈارز، ایئر بورن ارلی وارننگ پلیٹ فارمز اور کمانڈ اینڈ کنٹرول مراکز نے فیصلہ سازی کے عمل کو تیز اور مؤثر بنایا ہے۔ اب فضائی دفاع ایک ہمہ گیر نظام کی صورت اختیار کر چکا ہے جس میں معلومات، نگرانی اور ردعمل ایک مربوط زنجیر کا حصہ ہیں۔
عصر حاضر کی جنگ صرف زمین اور فضا تک محدود نہیں رہی۔ سائبر اسپیس اور خلا بھی دفاعی حکمت عملی کا حصہ بن چکے ہیں۔ پاک فضائیہ نے سائبر اور اسپیس ڈومین کی اہمیت کو بروقت بھانپتے ہوئے اس میں پیش رفت کا آغاز کیا اور اب تک پاک فضائیہ نے ان شعبوں میں قابلِ ذکر پیش رفت کرلی ہے۔ سائبر سکیورٹی یونٹس، ڈیجیٹل کمانڈ انفراسٹرکچر اور محفوظ ڈیٹا لنکس نے آپریشنل تیاری کو نئی مضبوطی فراہم کی ہے۔
اسپیس بیسڈ نگرانی اور سیٹلائٹ ٹیکنالوجی کے استعمال سے صورتحال کا ادراک مزید بہتر ہوا ہے۔ یہ پیش رفت اس بات کی علامت ہے کہ پاک فضائیہ بدلتے ہوئے عالمی رجحانات سے ہم آہنگ رہتے ہوئے اپنی حکمت عملی کو وسعت دے رہی ہے۔
خود انحصاری کسی بھی دفاعی قوت کی پائیداری کی ضمانت ہوتی ہے۔ اسی حقیقت کو مدنظر رکھتے ہوئے پاک فضائیہ نے مقامی سطح پر تحقیق و ترقی کو فروغ دیا۔ پاک فضائیہ کے زیر انتظام چلنے والا ادارہ “نیشنل ایرو اسپیس سائنس اینڈ ٹیکنالوجی پارک” اس وژن کی عملی تصویر ہے جہاں مقامی انجینئرز، سائنس دان اور نوجوان ماہرین جدید فضائی ٹیکنالوجی کی تیاری میں مصروف عمل رہتے ہیں۔
مقامی سطح پر ڈرون پروگرامز، ایویانکس سسٹمز اور پریسیژن ہتھیاروں کی تیاری نے نہ صرف درآمدی انحصار کم کیا ہے بلکہ قومی معیشت اور ٹیکنالوجی سیکٹر کو بھی تقویت دی ہے۔ اس کے ساتھ ساتھ “پاکستان ایروناٹیکل کمپلیکس” نے مقامی سطح پر طیاروں کی تیاری، اپ گریڈیشن اور مرمت کے شعبے میں نمایاں کردار ادا کیا ہے۔ان اقدامات نے یہ ثابت کیا کہ دفاعی طاقت صرف خریدی نہیں جاتی بلکہ تعمیر بھی کی جاتی ہے۔
اس میں کوئی شبہہ نہیں کہ کسی بھی ادارے کی سمت کا تعین اس کی قیادت کرتی ہے۔ موجودہ دور کو دیکھا جائے تو ایئر چیف ظہیر احمد بابر سدھو کی سربراہی میں پاک فضائیہ کی پرعزم قیادت نے دانشمندانہ فیصلے کرتے ہوئے معیار، صلاحیت اور لاگت کے توازن کو ترجیح دی۔ جدید پلیٹ فارمز کی شمولیت میں احتیاط، مقامی حل کی حوصلہ افزائی اور طویل المدتی منصوبہ بندی اس وژن کی جھلک ہے۔
پاک فضائیہ کے سربراہ ایئر چیف مارشل ظہیر احمد بابر سدھو کی قیادت میں پاک فضائیہ نے اس بات کو یقینی بنایا کہ جدیدیت محض نمائشی نہ ہو بلکہ آپریشنل ضرورت سے ہم آہنگ ہو۔ ٹریننگ ڈاکٹرائن کو اپ ڈیٹ کیا گیا ہے، سمیولیٹر بیسڈ تربیت کو فروغ دیا گیا ہے اور بین الاقوامی مشقوں کے ذریعے پائلٹس کو عالمی معیار کے مطابق تیار کیا گیا ہے۔
ٹیکنالوجی اپنی جگہ اہم ہے، مگر اس کا مؤثر استعمال انسانی مہارت پر منحصر ہوتا ہے۔ پاک فضائیہ نے اپنے افسران اور جوانوں کی پیشہ ورانہ تربیت پر خصوصی توجہ دی۔ فلائنگ آورز، تکنیکی کورسز، انجینئرنگ مہارت اور لیڈرشپ ٹریننگ نے ایک ایسے انسانی سرمایہ کو جنم دیا جو جدید نظاموں کو مؤثر انداز میں استعمال کرنے کی صلاحیت رکھتا ہے۔ اسی انسانی مہارت کا مظاہرہ مختلف آپریشنز اور مشقوں میں بارہا ہو چکا ہے، جہاں پاک فضائیہ نے پیشہ ورانہ معیار اور نظم و ضبط کا ثبوت دیا۔
خود انحصاری کا مطلب عالمی تعاون سے لاتعلقی نہیں۔ پاک فضائیہ نے درآمدی جدید پلیٹ فارمز اور مقامی طور پر تیار کردہ نظاموں کے درمیان ایک متوازن امتزاج قائم کیا ہے۔ یہ توازن نہ صرف آپریشنل صلاحیت کو بڑھاتا ہے بلکہ ٹیکنالوجی کی منتقلی اور مقامی مہارت کے فروغ کا ذریعہ بھی بنتا ہے۔ یہ حکمت عملی اس امر کی عکاس ہے کہ پاکستان ایک ذمہ دار اور حقیقت پسندانہ دفاعی پالیسی پر عمل پیرا ہے، جہاں وسائل کا مؤثر استعمال اور طویل المدتی استحکام کو پیش نظر رکھا جاتا ہے۔
جنوبی ایشیا میں بدلتی ہوئی سکیورٹی صورتحال کے پیش نظر ایک مضبوط اور قابلِ اعتماد فضائی طاقت کا وجود ناگزیر ہے۔ پاک فضائیہ نے اپنی جدیدیت اور خود انحصاری کے ذریعے یہ ثابت کیا ہے کہ وہ نہ صرف دفاعی تقاضوں کو پورا کرنے کی صلاحیت رکھتی ہے بلکہ خطے میں اسٹریٹجک استحکام کی ضامن بھی ہے۔ ایک جدید فضائی قوت کا مقصد محض عسکری برتری نہیں بلکہ امن کا تحفظ بھی ہوتا ہے۔ مضبوط ڈیٹرنس دشمن کو مہم جوئی سے روکتی ہے اور طاقت کا توازن برقرار رکھتی ہے۔
آج جب ہم پاک فضائیہ کی کامیابیوں اور جدیدیت کے سفر پر نظر ڈالتے ہیں تو یہ واضح ہوتا ہے کہ یہ ایک جاری عمل ہے۔ نئے تحقیقی منصوبے، مقامی صنعت کا فروغ، سائبر اور اسپیس شعبوں میں مزید سرمایہ کاری اور نوجوان انجینئرز کی شمولیت اس امر کی علامت ہے کہ پاکستان کا دفاعی مستقبل مضبوط ہاتھوں میں ہے۔
سالگرہ اور یادگار دن محض تقریبات نہیں ہوتے بلکہ یہ ہمیں عزم کی تجدید کا موقع فراہم کرتے ہیں۔ پاک فضائیہ کی جدیدیت اور خود انحصاری کا سفر دراصل قومی خودمختاری کے تحفظ کی کہانی ہے۔ اس کہانی کی بُنت میں پاک فضائیہ کے سربراہ ایئر چیف مارشل ظہیر احمد بابر سدھو کی بصیرت افروز قیادت نے اہم کردار ادا کیا ہے
یہ کہانی اس بات کا اعلان ہے کہ پاکستان کی فضائیں محفوظ ہیں، اس کی دفاعی سوچ جدید ہے اور اس کی قیادت مستقبل بین ہے۔ جدیدیت، خود انحصاری اور بصیرت افروز قیادت کے اس امتزاج نے پاک فضائیہ کو ایک باوقار، مضبوط اور قابلِ اعتماد فضائی قوت میں تبدیل کر دیا ہےاور یہی قوتِ بازو، قومی دفاع کے مستقبل کی سب سے بڑی ضمانت ہے۔
