پاکستانی خواتین کا ملکی ترقی وخوشحالی میں اہم کردار ہے ،جمال شاہ کاکڑ

پاکستان مسلم لیگ (ن)بلوچستان کے جنرل سیکرٹری و رکنِ قومی اسمبلی جمال شاہ کاکڑ نے کہا ہے کہ پاکستانی خواتین ملکی ترقی، خوشحالی اور استحکام میں ریڑھ کی ہڈی کی حیثیت رکھتی ہیں۔اسلام نے خواتین کو جو حقوق عطا کیے، آج کی مہذب دنیا بھی ان کی اہمیت کو تسلیم کرتی ہے، اور پاکستان مسلم لیگ (ن)کی قیادت ہمیشہ خواتین کے حقوق کے تحفظ اور انہیں بااختیار بنانے کے لیے عملی اقدامات کرتی رہی ہے۔ خواتین کے قومی دن کے موقع پر اپنے پیغام میں جمال شاہ کاکڑ نے کہا کہ وفاقی حکومت خواتین کی تعلیم، صحت، روزگار اور معاشی خودمختاری کے لیے متعدد اقدامات کر رہی ہے۔ خواتین کے لیے خصوصی اسکالرشپس، ہنر مندی کے پروگرامز، کاروباری معاونت اسکیمیں، تحفظِ خواتین کے قوانین میں بہتری اور کام کی جگہوں پر ہراسیت کے خلاف موثر نظام کا قیام حکومت کی ترجیحات میں شامل ہے۔ انہوں نے کہا کہ بینظیر انکم سپورٹ پروگرام اور دیگر سماجی تحفظ کی اسکیموں کے ذریعے لاکھوں مستحق خواتین کو مالی معاونت فراہم کی جا رہی ہے تاکہ وہ معاشی طور پر خود کفیل بن سکیں۔انہوں نے کہا کہ پنجاب میں پہلی خاتون وزیراعلی کی قیادت میں خواتین کی فلاح و بہبود کے لیے تاریخی اقدامات کیے جا رہے ہیں۔ خواتین کے لیے محفوظ ٹرانسپورٹ، ہنر سکھانے کے مراکز، صحت کارڈ کی سہولت، کاروباری قرضوں کی فراہمی، اور خواتین کے تحفظ کے لیے خصوصی اقدامات اس بات کا ثبوت ہیں کہ مسلم لیگ (ن)خواتین کو قومی دھارے میں باعزت مقام دلانے کے لیے سنجیدہ ہے۔جمال شاہ کاکڑ نے کہا کہ خواتین کے بغیر ترقی کا خواب ادھورا ہے اور وقت کا تقاضا ہے کہ ہم خواتین کو مساوی مواقع فراہم کریں تاکہ وہ ہر شعبے میں اپنی صلاحیتوں کا لوہا منوا سکیں۔ انہوں نے اس عزم کا اظہار کیا کہ پاکستان مسلم لیگ (ن)خواتین کے حقوق کے تحفظ، ان کی عزت و وقار اور عملی بااختیاری کے لیے اپنی جدوجہد جاری رکھے گی