مصر میں دو ٹرینوں کے درمیان خوفناک تصادم، 7 افراد ہلاک، درجنوں زخمی

مصر کے شمالی علاقے میں دو مسافر ٹرینوں کے درمیان تصادم کے نتیجے میں کم از کم 7 افراد ہلاک اور درجنوں زخمی ہوگئے، جبکہ حادثے کے بعد متعدد بوگیاں پٹری سے اتر کر الٹ گئیں۔

رپورٹس کے مطابق ایک ٹرین گیزا سے جنوب مغرب میں واقع فیوم نخلستان کی جانب جا رہی تھی، جبکہ دوسری ٹرین قاہرہ سے جنوبی شہر اسوان کے لیے روانہ ہوئی تھی۔

حادثے کے بعد سامنے آنے والی ویڈیوز میں ٹرین کی متعدد الٹی ہوئی بوگیاں دیکھی گئیں، جبکہ بڑی تعداد میں لوگ جائے وقوعہ پر جمع ہوگئے۔

حادثے کی وجوہات تاحال معلوم نہیں ہوسکیں۔ مصری صدر عبدالفتاح السیسی نے واقعے کی تحقیقات کا حکم دیتے ہوئے کہا ہے کہ غفلت کے مرتکب کسی بھی شخص کو جواب دہ ٹھہرایا جائے گا۔

حکام کے مطابق حادثے کی وجوہات جاننے اور ذمہ داروں کا تعین کرنے کے لیے تحقیقات جاری ہیں۔