آئینی عدالت کے پشاور ہائیکورٹ سے متعلق 5 نومبر کے فیصلے سے کئی پیچیدگیاں پیدا ہوئیں، بیرسٹر گوہر

چیئرمین پاکستان تحریک انصاف بیرسٹر گوہر نے کہا ہے کہ وفاقی آئینی عدالت کے 5 نومبر کے فیصلے کے باعث کئی پیچیدگیاں پیدا ہوئی ہیں، جس سے سیاسی شخصیات کے ساتھ عام شہری بھی متاثر ہو رہے ہیں۔

بیرسٹر گوہر کے مطابق آئینی عدالت نے پشاور ہائیکورٹ میں بعض آئینی درخواستوں پر کارروائی معطل کرنے کا حکم دیا تھا، جس کے بعد پشاور ہائیکورٹ نے 10 نومبر کو سماعت کے لیے مقرر پی ٹی آئی کے مقدمات ڈی لسٹ کر دیے۔

انہوں نے کہا کہ عدالت کو انتظامی سطح پر مقدمات ڈی لسٹ نہیں کرنے چاہیے تھے بلکہ سماعت کرکے 5 نومبر کے فیصلے کے اطلاق کا تعین کرنا چاہیے تھا۔

چیئرمین پی ٹی آئی نے کہا کہ حکمِ امتناع واپس لینے کے لیے وفاقی آئینی عدالت سے رجوع کیا جائے گا۔

واضح رہے کہ وفاقی آئینی عدالت نے 5 نومبر کے فیصلے میں پشاور ہائیکورٹ کو ایم پی او کے تحت گرفتاریوں سے متعلق مقدمات کی سماعت سے روک دیا تھا۔