نوڈیرو میں پولیس کے مبینہ ناروا رویے اور امن و امان کی صورتحال کے خلاف 6 نومبر کو احتجاج کا اعلان

نوڈیرو(رپورٹ:عابد بھٹو) شہری ایکشن کمیٹی نوڈیرو کا اہم اجلاس چیئرمین غلام حیدر ناریجو کی صدارت میں جاوید احمد بھٹو کی رہائش گاہ آستانہ ذکریا پر منعقد ہوا، جس میں نوڈیرو شہر کی مختلف سیاسی، سماجی، مذہبی، کاروباری اور مزدور تنظیموں کے رہنماؤں نے شرکت کی۔اجلاس میں شہری ایکشن کمیٹی کے وائس چیئرمین جاوید احمد بھٹو، سرتاج علی شیخ، محمد سلیم چنا، مہیش کمار (ببلو)، مولانا محمد طیب کندھر، پی پی پی شہید بھٹو کے شاہد میاں بھٹو، غلام نبی کولاچی، جے یو آئی کے حافظ محمد ابوبکر کوریجو، مولانا عبدالسلام دھاریجو، فنکشنل لیگ کے نسیم احمد منگنیجو، امداد علی میرانی، قومی عوامی تحریک کے امان اللہ بھٹو، سائیں عبدالرحمان سپڑو، مزدور اتحاد کے صاحب خان شیخ، غوثیہ جماعت کے ضمیر حسین بھٹو، سندھ نوجوان اتحاد کے راحیل عباس کلہوڑو، الشہباز گڈز ٹرانسپورٹ کے وزیر علی انصاری اور پاکستان ٹریڈ یونین کے اسداللہ راہوجو، پروفیسر غلام حسین کٹپر اور محمد سلیمان بھٹو نے شرکت کی۔اجلاس کے دوران نوڈیرو شہر کی امن و امان کی مجموعی صورتحال کا تفصیلی جائزہ لیا گیا۔ شریک رہنماؤں نے نوڈیرو شہر میں بڑھتی ہوئی غنڈہ گردی، بدمعاشی، نوڈیرو پولیس کی عدم دلچسپی اور ایس ایچ او نوڈیرو کے اڑنگے رویے اور پولیس گردی کے خلاف اپنی رائے کا اظہار کرتے ہوئے کہا کہ شہریوں کی جان و مال کا تحفظ پولیس کی بنیادی ذمہ داری ہے، لیکن نوڈیرو میں اس کے برعکس ہو رہا ہے، پولیس تحفظ دینے کے بجائے خود عوام آزار کردار ادا کر رہی ہے اور عوام کی شکایات کا ازالہ کرنے کے بجائے سفارشی مجرموں کو تحفظ دیا جا رہا ہے اور عوام کے ساتھ زور و تحقیر والا رویہ اختیار کیا گیا ہے۔
اجلاس میں تمام شرکاء کی مشترکہ صلاح و رائے سے فیصلہ کیا گیا کہ نوڈیرو پولیس کے اس رویے کے خلاف 6 نومبر 2026ء بروز جمعہ صبح 11 بجے میونسپل کمیٹی روڈ پر پرامن احتجاج ریکارڈ کرایا جائے گا۔