بلوچستان کے تاجروں کو آسان قرضے فراہم کیے جائیں، بلال خان کاکڑ

کوئٹہ: بلوچستان سرمایہ کاری بورڈ کے وائس چیئرمین بلال خان کاکڑ سے ایکسپورٹ امپورٹ بینک آف پاکستان (EXIM Bank) کے صدر و چیف ایگزیکٹو آفیسر شہباز ایچ سید نے ملاقات کی، جس میں صوبے کے کاروباری طبقے کو درپیش مالی مشکلات، قرضوں کے حصول میں رکاوٹوں اور کاروباری سرگرمیوں کے فروغ پر تفصیلی تبادلہ خیال کیا گیا۔

ملاقات میں بی بی او آئی ٹی کے چیف ایگزیکٹو آفیسر عبدالمنان اور ٹریڈ ڈویلپمنٹ اتھارٹی آف پاکستان کے شہریار خان بھی موجود تھے۔

بلال خان کاکڑ نے کہا کہ بلوچستان کے تاجروں، صنعت کاروں، برآمد کنندگان اور درآمد کنندگان کو کاروبار کی توسیع کے لیے مالی معاونت اور قرضوں کے حصول میں مشکلات کا سامنا ہے۔ انہوں نے زور دیا کہ EXIM بینک اس حوالے سے مؤثر کردار ادا کرتے ہوئے کاروباری افراد کو آسان شرائط پر قرضوں اور دیگر مالی سہولیات کی فراہمی میں تعاون کرے، تاکہ وہ ملکی اور بین الاقوامی تجارت میں اپنا کردار مزید مؤثر انداز میں ادا کر سکیں۔

EXIM بینک کے صدر و سی ای او شہباز ایچ سید نے بلوچستان کے کاروباری طبقے کو مالی سہولیات کی فراہمی میں مثبت دلچسپی کا اظہار کیا۔ ملاقات میں اس سلسلے میں تعاون آگے بڑھانے اور قابلِ عمل اقدامات پر بھی اتفاق کیا گیا۔