شہباز شریف کی ذہانت کا دنیا کے معروف سائنسدان نیوٹن سے موازنہ، بیان سوشل میڈیا پر وائرل

اسلام آباد: وزیر اعظم شہباز شریف کے معاون خصوصی حذیفہ رحمان کی جانب سے وزیر اعظم کی ذہانت کا موازنہ معروف سائنسدان آئزک نیوٹن سے کرنے کا بیان سوشل میڈیا پر وائرل ہوگیا۔

ایک ٹی وی پروگرام میں گفتگو کرتے ہوئے حذیفہ رحمان نے دعویٰ کیا کہ وزیر اعظم شہباز شریف کا آئی کیو معروف سائنسدان آئزک نیوٹن کے آئی کیو کے قریب ہے۔ انہوں نے کہا کہ وزیر اعظم صبح 6 بجے سے رات 10 بجے تک کام کرتے ہیں اور ہر ہفتے وفاقی کابینہ کا اجلاس منعقد کرتے ہیں۔

حذیفہ رحمان کے مطابق شہباز شریف بدعنوانی اور ناقص کارکردگی برداشت نہیں کرتے اور کابینہ کے ارکان کی کارکردگی پر کڑی نظر رکھتے ہیں۔ ان کا کہنا تھا کہ وزیر اعظم کی توقعات پر پورا نہ اترنے والے وزرا ان کے قریبی حلقے میں جگہ برقرار نہیں رکھ سکتے۔

انہوں نے کہا کہ اگر وزیر اعظم کو مکمل اختیار حاصل ہو تو کابینہ کے 55 وزرا میں سے 52 یا 53 کو فارغ کرکے صرف دو یا تین وزرا کو برقرار رکھیں۔ حذیفہ رحمان نے مزید کہا کہ وہ خود بھی ان چند افراد میں شامل ہوں گے جو وزیر اعظم کے معیار پر پورا اترتے ہیں۔

حذیفہ رحمان کا یہ بیان سوشل میڈیا پر موضوعِ بحث بن گیا ہے۔