وزیراعلیٰ بلوچستان کے خلاف سوشل میڈیا پر منفی پروپیگنڈے کی تردید کرتے ہیں، شاہد رند

صوبائی حکومت کے ترجمان شاہد رند نے گزشتہ دو دنوں سے تواتر کے ساتھ سوشل میڈیا پر وزیرِ اعلیٰ کے حوالے سے جاری منفی پروپیگنڈے اور کردار کشی کی خبروں کی سختی سے تردید کی ہے۔ انہوں نے کہا کہ ان خبروں میں کوئی صداقت نہیں ہے؛ نہ ہی اس طرح کا کوئی واقعہ رونما ہوا ہے اور نہ ہی اس قسم کا کوئی چھاپا پڑا ہے۔ انہوں نے واضح کیا کہ یہ خبریں وہ لوگ چلا رہے ہیں جو حکومت کی کارکردگی سے خائف ہیں اور عدم اعتماد کی فضا قائم کرنا چاہتے ہیں۔ اس سلسلے میں جھوٹی خبریں مختلف سوشل میڈیا پلیٹ فارمز پر شائع کرنے والوں کے خلاف قانونی کارروائی کے لیے این سی سی آئی سے رجوع کر لیا گیا ہے اور اس طرح کی جھوٹی خبریں پھیلانے والے جلد قانون کے کٹہرے میں ہوں گے۔