اوستہ محمد میں جرائم پیشہ عناصر کے خلاف بلاامتیاز کارروائیاں جاری ہیں، ایس ایچ او حضور بخش جمالی

اوستہ محمد جرائم پیشہ عناصر کے خلاف بلاامتیاز کارروائیاں جاری ہیں، شہریوں کے جان و مال کا تحفظ پولیس کی اولین ترجیح ہے، ایس ایچ او حضور بخش جمالی
اوستہ محمد۔۔۔ (رپورٹ یونس رحیم نوتکانی)ایس ایچ او پولیس تھانہ صدر اوستہ محمد حضور بخش جمالی نے کہا ہے کہ شہر میں امن و امان کی صورتحال برقرار رکھنے اور جرائم پیشہ عناصر کے خاتمے کے لیے پولیس کی کارروائیاں تسلسل کے ساتھ جاری ہیں۔ جرائم پیشہ عناصر کے خلاف بلاامتیاز کارروائی عمل میں لائی جا رہی ہے، جبکہ منشیات فروشوں، چوروں، ڈکیتوں اور دیگر سماج دشمن عناصر کے خلاف قانون کے مطابق سخت اقدامات کیے جا رہے ہیں۔انہوں نے کہا کہ پولیس عوام کے جان و مال کے تحفظ اور شہر میں امن و امان برقرار رکھنے کے لیے تمام دستیاب وسائل بروئے کار لا رہی ہے۔ جرائم کی روک تھام کے لیے گشت اور نگرانی کے نظام کو مؤثر بنایا جا رہا ہے، جبکہ مشکوک افراد اور جرائم پیشہ عناصر پر کڑی نظر رکھی جا رہی ہے۔ایس ایچ او حضور بخش جمالی کا کہنا تھا کہ عوام اور پولیس کے درمیان اعتماد اور تعاون جرائم کے خاتمے میں اہم کردار ادا کرتا ہے۔ شہری اپنے اردگرد کسی بھی مشکوک سرگرمی یا جرائم پیشہ عناصر کی موجودگی کی اطلاع فوری طور پر پولیس کو دیں، اطلاع دینے والے شہریوں کے ساتھ مکمل تعاون کیا جائے گا۔انہوں نے مزید کہا کہ پولیس کا مقصد عوام کو پرامن ماحول فراہم کرنا ہے اور کسی کو بھی قانون ہاتھ میں لینے کی اجازت نہیں دی جائے گی۔ شہر میں امن و امان کے قیام اور جرائم کے مکمل خاتمے تک پولیس اپنی ذمہ داریاں پوری محنت، ایمانداری اور فرض شناسی کے ساتھ ادا کرتی رہے گی۔