حافظ آباد؛ تبلیغی جماعت کی بس سیم نالہ میں گرنے سے 5افراد جاں بحق، 27 سے زائد زخمی

حافظ آباد کے علاقے پنڈی بھٹیاں میں فتکی فلائی اوور پر مسافر بس حادثے کا شکار ہوگئی، جس کے نتیجے میں تبلیغی جماعت کے 5 افراد جاں بحق جبکہ 27 سے زائد زخمی ہوگئے۔

ریسکیو حکام کے مطابق بس رائیونڈ سے چنیوٹ میں تبلیغی اجتماع میں شرکت کے لیے جا رہی تھی اور اس میں تقریباً 65 افراد سوار تھے۔ فتکی فلائی اوور پر بس بے قابو ہوکر سیم نالے میں جا گری۔

ابتدائی اطلاعات کے مطابق ڈرائیور کو نیند آنے کے باعث حادثہ پیش آیا۔ اطلاع ملتے ہی ریسکیو ٹیمیں موقع پر پہنچ گئیں اور زخمیوں کو نکال کر تحصیل ہیڈکوارٹر اسپتال پنڈی بھٹیاں منتقل کردیا گیا۔

ریسکیو حکام کا کہنا ہے کہ زخمیوں میں سے تین کی حالت تشویشناک ہے، جنہیں طبی امداد فراہم کی جا رہی ہے۔ حادثے کے بعد امدادی کارروائیاں مکمل کرنے اور واقعے کی وجوہات جاننے کے لیے اقدامات جاری ہیں۔