غلط چالان پر ٹریفک افسران کے خلاف کارروائی ہوگی، ڈی ایس پی سجاد آغا

کوئٹہ: ڈی ایس پی ٹریفک سجاد آغا نے کہا ہے کہ کوئٹہ میں ٹریفک نظام کو جدید تقاضوں سے ہم آہنگ کرنے اور اصلاحات کے لیے اقدامات شروع کر دیے گئے ہیں۔ غلط چالان کرنے والے متعلقہ افسران کے خلاف کارروائی کی جائے گی، جبکہ شہری ٹریفک اہلکاروں کی کسی بھی کوتاہی کی شکایت براہِ راست ٹریفک آفس میں درج کرا سکتے ہیں۔

انہوں نے ان خیالات کا اظہار ٹریفک آفس میں ٹریفک قوانین سے متعلق شعور و آگاہی مہم کے تحت نوجوانوں کے سیمینار اور میڈیا سے گفتگو کرتے ہوئے کیا۔

ڈی ایس پی سجاد آغا نے کہا کہ ٹریفک اصلاحات وزیراعلیٰ بلوچستان اور آئی جی پولیس بلوچستان کے وژن کے مطابق متعارف کرائی جا رہی ہیں۔ اس مہم کا بنیادی مقصد شہریوں میں ٹریفک قوانین سے متعلق شعور پیدا کرنا اور سڑکوں پر نظم و ضبط کو بہتر بنانا ہے۔

انہوں نے کہا کہ ٹریفک مسائل کی ایک بڑی وجہ قوانین سے ناواقفیت ہے۔ شہریوں کو نو پارکنگ اور دیگر ٹریفک قوانین کی خلاف ورزی سے گریز کرنا چاہیے اور جرمانے کی صورت میں اہلکاروں کے ساتھ الجھنے کے بجائے قانون کے مطابق عمل کرنا چاہیے۔

ان کا کہنا تھا کہ پہلے مرحلے میں عوام میں آگاہی پیدا کرنے پر توجہ دی جائے گی، جبکہ ٹریفک قوانین کی خلاف ورزی کرنے والوں کے خلاف بتدریج جرمانے سمیت قانونی کارروائی بھی کی جائے گی۔

ڈی ایس پی ٹریفک نے شہریوں سے اپیل کی کہ ٹریفک نظام کو بہتر بنانے کے لیے اہلکاروں کے ساتھ تعاون کریں۔ انہوں نے کہا کہ نفری کی کمی کے باوجود ٹریفک پولیس پورے کوئٹہ شہر میں نظام کو رواں رکھنے کی کوشش کر رہی ہے اور شہریوں کے مفاد میں مزید اقدامات بھی کیے جائیں گے۔