بھارت کا مکروہ چہرہ دنیا کے سامنے بے نقاب ہو چکا ہے، ڈپٹی کمشنر خالد خان

ڈپٹی کمشنر جعفرآباد خالد خان نے کہا ہے کہ نام نہاد جمہوریت کا دعوے دار بھارت کا مکروہ چہرہ دنیا کے سامنے بے نقاب ہو چکا ہے، کشمیری عوام کے بنیادی حقوق پر ڈاکہ ڈالنے، ان کی آزادی سلب کرنے اور مقبوضہ کشمیر پر غاصبانہ قبضہ برقرار رکھنے والے بھارت کو رسوائی کے سوا کچھ حاصل نہیں ہوا۔ کشمیری عوام پر جاری ظلم و جبر، انسانی حقوق کی پامالی اور بھارتی غاصبانہ قبضے کے خلاف آج ملک بھر کی طرح ضلع جعفرآباد میں بھی یومِ سیاہ منایا جا رہا ہے، جس کا مقصد عالمی برادری کی توجہ مسئلہ کشمیر کی جانب مبذول کرانا اور مظلوم کشمیری عوام کے ساتھ یکجہتی کا اظہار کرنا ہے۔ ان خیالات کا اظہار انہوں نے 27 اکتوبر یومِ سیاہ کے موقع پر ڈپٹی کمشنر آفس جعفرآباد سے نکالی گئی ریلی کے شرکاء سے خطاب کرتے ہوئے کیا۔ ریلی صبح 10 بجے ڈپٹی کمشنر آفس سے روانہ ہوئی، جو شہر کی مختلف شاہراہوں سے ہوتی ہوئی واپس ڈپٹی کمشنر آفس پہنچ کر اختتام پذیر ہوئی۔ ریلی کے آغاز سے قبل کشمیری عوام کے ساتھ اظہارِ یکجہتی اور ان کی جدوجہدِ آزادی کی حمایت میں ایک منٹ کی خاموشی اختیار کی گئی۔ ریلی میں شریک افسران، ملازمین اور دیگر شرکاءنے ہاتھوں میں پلے کارڈز اور بینرز اٹھا رکھے تھے، جن پر بھارتی مظالم، انسانی حقوق کی خلاف ورزیوں اور مقبوضہ کشمیر پر غاصبانہ قبضے کے خلاف نعرے درج تھے۔ ڈپٹی کمشنر خالد خان نے مزید کہا کہ 27 اکتوبر کشمیری عوام کی تاریخ کا ایک سیاہ دن ہے، جب 1947 میں بھارت نے مقبوضہ کشمیر میں اپنی فوجیں اتار کر کشمیری عوام کی امنگوں کے برخلاف قبضے کی بنیاد رکھی۔ انہوں نے کہا کہ کشمیری عوام کئی دہائیوں سے بھارتی مظالم کا سامنا کرنے کے باوجود اپنے حقِ خودارادیت کے حصول کے لیے ثابت قدم ہیں۔ انہوں نے عالمی برادری اور انسانی حقوق کی عالمی تنظیموں پر زور دیا کہ وہ مقبوضہ کشمیر میں جاری انسانی حقوق کی خلاف ورزیوں کا نوٹس لیں اور اقوام متحدہ کی قراردادوں کے مطابق کشمیری عوام کو ان کا تسلیم شدہ حقِ خودارادیت دلانے کے لیے مو¿ثر کردار ادا کریں۔ انہوں نے کہا کہ پاکستانی قوم کشمیری عوام کی سیاسی، اخلاقی اور سفارتی حمایت جاری رکھے گی اور ان کی جدوجہدِ آزادی میں ہمیشہ ان کے شانہ بشانہ کھڑی رہے گی۔