احتجاج کیس؛ علیمہ خان کے خلاف فیصلہ 26 نومبر کو سنایا جائے گا

راولپنڈی: احتجاج کیس میں علیمہ خان کے خلاف فیصلہ ایک بار پھر مؤخر کردیا گیا ہے۔ انسداد دہشت گردی عدالت نے اب فیصلہ 26 نومبر کو سنانے کی تاریخ مقرر کردی ہے۔

تفصیلات کے مطابق انسداد دہشت گردی عدالت کے جج امجد علی شاہ نے مقدمے کا فیصلہ پانچویں مرتبہ مؤخر کیا۔ سماعت کے موقع پر علیمہ خان نظر بند ہونے کے باعث عدالت میں پیش نہ ہوسکیں، جبکہ مقدمے کے دیگر 11 ملزمان کمرہ عدالت میں موجود تھے۔

سماعت کے دوران وکیلِ صفائی فیصل محمود ملک اور پراسیکیوٹر بھی عدالت میں موجود تھے۔ عدالت نے مقدمے کا فیصلہ اب 26 نومبر کو سنانے کا اعلان کیا ہے۔

واضح رہے کہ علیمہ خان کے خلاف یہ مقدمہ تھانہ صادق آباد پولیس نے درج کیا تھا۔