پشاور اسکول سانحے کی ابتدائی رپورٹ تیار

پشاور: دیر کالونی میں اسکول کی چھت گرنے کے افسوسناک واقعے کی ابتدائی رپورٹ ریسکیو حکام اور ضلعی انتظامیہ نے صوبائی حکومت کو ارسال کر دی ہے۔ رپورٹ میں اسکول کی عمارت کی خستہ حالی اور چھت کو عارضی سہارا دیے جانے سے متعلق اہم تفصیلات سامنے آئی ہیں۔

رپورٹ کے مطابق حادثہ اسکول کی نچلی عمارت کے سائیڈ والے کلاس روم میں پیش آیا، جہاں تیسری منزل سے چھت نیچے آ گری۔ چھت تقریباً 20 سے 25 فٹ کی بلندی پر واقع تھی۔ اسکول کے کمروں کی چھتیں پہلے سے تعمیر شدہ تھیں، تاہم بالائی منزل کی چھت بارشوں کے باعث خستہ ہو چکی تھی۔

ابتدائی رپورٹ میں بتایا گیا ہے کہ اسکول کے مالک خان محمد کو بچوں نے چھت کی خراب حالت کے بارے میں آگاہ بھی کیا تھا۔ اس کے باوجود چھت کو عارضی سہارا دے کر بچوں کو اسکول بلایا گیا۔

رپورٹ کے مطابق ضلعی انتظامیہ نے متاثرہ کلاس رومز کے علاوہ عمارت کے دیگر حصوں کو بھی غیر محفوظ قرار دیا ہے۔ اسکول کی رجسٹریشن کے حوالے سے بھی تاحال تصدیق نہیں ہو سکی۔