سیکیورٹی فورسز کی بلوچستان میں کارروائیاں، 5 دہشت گرد ہلاک

کوئٹہ (ویب ڈیسک): بلوچستان میں سیکیورٹی فورسز کی کارروائیوں کے دوران واشک اور مستونگ میں مجموعی طور پر 5 دہشت گرد ہلاک کردیے گئے، جبکہ دشت اور تربت میں غیرقانونی طور پر بیرون ملک جانے کی کوشش کرنے والے 104 افغان شہریوں کو گرفتار کرلیا گیا۔

آئی ایس پی آر کے مطابق سیکیورٹی فورسز نے 12 اور 13 اکتوبر کی درمیانی شب ضلع واشک میں دہشت گردوں کی موجودگی کی اطلاع پر انٹیلی جنس بیسڈ آپریشن کیا۔ کارروائی کے دوران فتنۃ الہندوستان سے تعلق رکھنے والے 5 دہشت گرد ہلاک ہوگئے۔

ترجمان پاک فوج کے مطابق سیکیورٹی فورسز نے فوری کارروائی کرتے ہوئے دہشت گردوں کا ٹھکانہ تباہ کردیا۔ موقع سے اسلحہ، گولہ بارود اور دھماکا خیز مواد بھی برآمد کیا گیا۔ علاقے میں ممکنہ طور پر موجود دیگر دہشت گردوں کی تلاش کے لیے کلیئرنس آپریشن جاری ہے۔

دوسری جانب سیکیورٹی ذرائع کے مطابق مستونگ کے علاقے پرنگ آباد کے قریب دہشت گردوں کی نقل و حرکت پر کارروائی کی گئی، جس کے نتیجے میں مزید 2 دہشت گرد ہلاک ہوگئے۔

سیکیورٹی ذرائع کا کہنا ہے کہ آپریشن ردالفتنہ 3 کے تحت بلوچستان میں دہشت گردی کے ساتھ انسانی اسمگلنگ کی روک تھام کے لیے بھی کارروائیاں جاری ہیں۔ دشت اور تربت میں غیرقانونی طور پر ایران اور یورپ جانے کی کوشش کرنے والے 104 افغان شہریوں کو گرفتار کیا گیا۔

سیکیورٹی فورسز کے مطابق عزمِ استحکام کے تحت غیر ملکی سرپرستی میں ہونے والی دہشت گردی کے خاتمے اور انسانی اسمگلنگ کی روک تھام کے لیے کارروائیاں جاری رکھی جائیں گی۔