عقیدہ ختمِ نبوت کا تحفظ ہر مسلمان کے ایمان کا بنیادی تقاضا ہے، حافظ صدیق مدنی

عالمی مجلس تحفظ ختم نبوت کی خدمات قابل تحسین ہیں۔ جمعیت چمن

چمن (نامہ نگار) جمعیت علماء اسلام چمن بلوچستان کے رہنماء اور ممبر یوتھ پارلیمنٹ حافظ محمد صدیق مدنی نے کہا ہے کہ عقیدہ ختمِ نبوت اسلام کے بنیادی اور قطعی عقائد میں شامل ہے۔ حضور اکرم حضرت محمد مصطفیٰ ﷺ اللہ تعالیٰ کے آخری نبی اور رسول ہیں، آپ ﷺ کے بعد کسی نئے نبی کی گنجائش نہیں۔ عقیدۂ ختمِ نبوت کا تحفظ ہر مسلمان کی دینی، ایمانی اور اخلاقی ذمہ داری ہے۔ انہوں نے کہا کہ امت مسلمہ کا اس بنیادی عقیدے پر غیر متزلزل ایمان ہے اور اس کے تحفظ کے لیے علماء کرام نے ہر دور میں تاریخی کردار ادا کیا ہے۔ ہمیں اس عظیم عقیدے کی اہمیت کو نئی نسل تک منتقل کرنے، دینی تعلیمات کو عام کرنے اور معاشرے میں اسلامی شعور بیدار کرنے کی ضرورت ہے۔ حافظ محمد صدیق مدنی نے کہا کہ عقیدۂ ختمِ نبوت کے تحفظ کی جدوجہد آئینی، قانونی، پُرامن اور جمہوری دائرے میں رہتے ہوئے جاری رہنی چاہیے۔ اس حوالے سے آئینِ پاکستان اور ملکی قوانین کا احترام، قومی یکجہتی اور معاشرتی امن برقرار رکھنا ہم سب کی مشترکہ ذمہ داری ہے۔ انہوں نے علماء کرام، دینی مدارس، تعلیمی اداروں اور تمام دینی و سماجی حلقوں پر زور دیا کہ وہ عقیدۂ ختمِ نبوت کے حوالے سے مستند دینی تعلیمات کو عام کریں اور نوجوان نسل کی فکری و دینی تربیت میں اپنا کردار ادا کریں۔ انہوں نے مزید کہا کہ عقیدۂ ختمِ نبوت ہمارے ایمان، محبتِ رسول ﷺ اور دینی شناخت کا اہم حصہ ہے۔ اس عقیدے کے تحفظ کے لیے علمی، فکری اور دعوتی جدوجہد کو مضبوط بنانا وقت کی اہم ضرورت ہے۔ عالمی مجلس تحفظ ختم نبوت ضلع چمن کے منتظمین کے زیر اہتمام تحفظ ختم نبوت کانفرنس کا انعقاد خوش آئند ہے اور کامیابی پر مبارکباد پیش کرتے ہیں ۔